Railway : రైల్వే ప్రయాణికులకు గుడ్‌ న్యూస్.. వెయ్యికి పైగా జనరల్ క్లాస్ బోగీలు
భారతీయ రైల్వే తన విస్తరణ పనుల కోసం పెద్ద దిశలో కృషి చేస్తున్నది. ప్రభుత్వం వందలాది రైళ్లకు వెయ్యికి పైగా జనరల్ క్లాస్ బోగీలను జోడించడానికి ఏర్పాట్లు చేస్తున్నట్లు తెలుస్తోంది. అలాగే, అనేక రైళ్లలో నాన్-ఏసీ బోగీల సంఖ్యను కూడా పెంచే యోచనలో ఉంది. ప్రధానంగా మిడిల్ క్లాస్ ప్రయాణికులు రైలు ప్రయాణాన్ని ఎక్కువగా ప్రాధాన్యం ఇస్తుంటారు, దాంతో కొత్తగా జోడించనున్న బోగీల వల్ల సుమారు 1 లక్ష ప్రయాణికులకు లాభం ఉండే అవకాశం ఉంది.
10,000 కంటే ఎక్కువ నాన్-ఏసీ బోగీలు
రైల్వే శాఖ ఒక పత్రికా ప్రకటనలో పేర్కొన్నట్లు నవంబర్ నెల చివరికి 370 రెగ్యులర్ రైళ్లకు 1,000కు పైగా జనరల్ సెకండ్ క్లాస్ బోగీలను జోడించనున్నట్లు వెల్లడైంది. అదేవిధంగా రాబోయే రెండు సంవత్సరాల్లో 10,000 కంటే ఎక్కువ నాన్-ఏసీ బోగీలు జోడించనున్నారు. గత 3 నెలల్లో రైల్వే శాఖ 600 జనరల్ క్లాస్ బోగీలను ఇప్పటికే చేర్చినట్లు తెలుస్తోంది. ఈ కొత్త బోగీలు రైలు ప్రయాణీకుల సంఖ్యను పెంచేలా ఉంటాయి, దాంతో రోజుకు 1 లక్ష మంది ప్రయాణికులకు లాభం కలుగుతుందని అధికారులు అంచనా వేస్తున్నారు.
రోజుకు 9,000మందికి పైగా ప్రయాణికులకు కొత్త సౌకర్యం
సెంట్రల్ రైల్వే చీఫ్ పబ్లిక్ రిలేషన్స్ ఆఫీసర్ డాక్టర్ స్వప్నిల్ నీలా ప్రకటనలో, సెంట్రల్ రైల్వే 42 రైళ్లలో 90జనరల్ క్లాస్ కోచ్‌లను జోడించనున్నట్లు తెలిపారు. ఈ నిర్ణయం వల్ల రోజుకు 9,000మందికి పైగా ప్రయాణికులకు కొత్త సౌకర్యం అందించబడుతుందని అంచనా. ఈ కొత్త బోగీల చేర్పు వల్ల స్లీపర్ కోచ్‌ల సంఖ్య సుమారు 4,000కి పెరిగే అవకాశం ఉంది, దాంతో రిజర్వేషన్లలో ఉన్న వెయిటింగ్ లిస్ట్‌ను తగ్గించడంలో సహాయం చేస్తుందని భావిస్తున్నారు. రైల్వే బోర్డు ఎగ్జిక్యూటివ్ డైరెక్టర్ దిలీప్ కుమార్ మాట్లాడుతూ, రైల్వే శాఖ అన్ని తరగతుల ప్రయాణికులకు మరింత సౌకర్యాలు అందించేందుకు కృషి చేస్తున్నట్లు తెలిపారు. కొత్తగా 1,000సెకండ్ జనరల్ క్లాస్ బోగీలను 370రెగ్యులర్ రైళ్లలో చేర్చబోతున్నామని ఆయన వెల్లడించారు.
నాన్-ఏసీ బోగీలు ఎల్‌హెచ్‌బీ తరహాలో..
డిమాండ్ పెరుగుతున్న నేపథ్యంలో ఈ నిర్ణయం తీసుకున్నారు. జనరల్ క్లాస్ ప్రయాణికులకు కోచ్‌ల నిర్మాణం శరవేగంగా జరుగుతోందని అధికారులు తెలిపారు. వచ్చే రెండేళ్లలో 10,000 కంటే ఎక్కువ నాన్-ఏసీ బోగీలను జోడించడానికి ప్రయత్నాలు చేస్తున్నామని చెప్పారు. వీటిలో 6,000 మందికి పైగా జనరల్ సెకండ్ కేటగిరీ కోచ్‌లు ఉంటాయని పేర్కొన్నారు. ఈ కొత్త బోగీల ప్రవేశంతో, ప్రతి రోజూ 8 లక్షల మంది అదనపు ప్రయాణికులు జనరల్ క్లాస్ లో ప్రయాణించగలరు. ప్రభుత్వం కొత్తగా తయారు చేసే నాన్-ఏసీ బోగీలు ఎల్‌హెచ్‌బీ తరహాలో ఉంటాయని వివరించింది. ఈ కొత్త కోచ్‌లు, రైల్వే సాంప్రదాయ ఐసీఎఫ్ కోచ్‌ల కంటే తేలికపాటి, బలమైనవి కావడం వల్ల ప్రమాద ప్రభావం కూడా తక్కువగా ఉంటుంది.
