Congress: కాంగ్రెస్‌లో చేరిన కడియం శ్రీహరి, కావ్య
మాజీ మంత్రి, బీఆర్ఎస్ స్టేషన్‌ ఘన్‌పూర్‌ ఎమ్మెల్యే కడియం శ్రీహరి,ఆయన కుమార్తె డాక్టర్ కావ్య ఆదివారం ఇక్కడ ముఖ్యమంత్రి,టీపీసీసీ చీఫ్‌ రేవంత్ రెడ్డి,ఏఐసీసీ ఇంచార్జి దీపాదాస్‌ మున్షీ సమక్షంలో కాంగ్రెస్‌లో చేరారు. బీఆర్ఎస్ నేతలిద్దరికీ దీపదాస్ మున్షీ కాంగ్రెస్ కండువాలు కప్పి కాంగ్రెస్ పార్టీలోకి ఆహ్వానించారు. వరంగల్ (ఎస్సీ)లోక్‌సభ స్థానానికి బీఆర్ఎస్ నామినేషన్ వేసిన డాక్టర్ కావ్య ఆ నామినేషన్‌ను తిరస్కరించి కాంగ్రెస్‌లో చేరారు. కాగా,స్టేషన్‌ఘన్‌పూర్‌ నియోజకవర్గం ధర్మసాగర్‌లో కడియం,ఆయన కుమార్తె కాంగ్రెస్‌లో చేరడాన్ని నిరసిస్తూ ఎంఆర్‌పీఎస్‌ కార్యకర్తలు నిరసన ప్రదర్శన నిర్వహించారు. కడియం శ్రీహరికి వ్యతిరేకంగా నినాదాలు చేశారు.కొందరు కార్యకర్తలు కిరోసిన్ పోసుకుని నిప్పంటించుకునే ప్రయత్నం చేశారు. అయితే పోలీసులు సకాలంలో స్పందించి వారిని కాపాడారు.అనంతరం వారిని పోలీస్ స్టేషన్‌కు తరలించారు.
