కర్ణాటక అసెంబ్లీ ఎన్నికలు: 23మంది అభ్యర్థులతో రెండో జాబితాను విడుదల చేసిన బీజేపీ
ఈ వార్తాకథనం ఏంటి
మే 10న జరగనున్న కర్ణాటక అసెంబ్లీ ఎన్నికలకు 23 మంది అభ్యర్థులతో కూడిన రెండో జాబితాను బీజేపీ విడుదల చేసింది. కర్ణాటక అసెంబ్లీలో 224 మంది సభ్యులు ఉండగా, మంగళవారం రాత్రి 189 స్థానాలకు అభ్యర్థుల పేర్లను పార్టీ ప్రకటించింది. తాజాగా 23మంది అభ్యర్థుల జాబితాను వెల్లడించారు. వాస్తవానికి రెండు దశల్లో అభ్యర్థుల జాబితాను విడుదల చేస్తామని ముఖ్యమంత్రి బసవరాజ్ బొమ్మై గతంలో చెప్పారు. కానీ పూర్తిస్థాయిలో అభ్యర్థుల పేర్లను పార్టీ వెల్లడించలేదు. 12 స్థానాలకు అభ్యర్థులను ఇంకా ఖరారు చేయాల్సి ఉండగా, త్వరలోనే మూడో జాబితా విడుదల కానుంది. రెండో జాబితాలో మాజీ ముఖ్యమంత్రి జగదీశ్ శెట్టర్ పేరు లేకపోవడం గమనార్హం.
కర్ణాటక
రెండో జాబితాలో ఇద్దరు మహిళలకు చోటు
రెండో జాబితాలో ఇద్దరు మహిళలకు చోటు దక్కింది. కోలార్ గోల్డ్ ఫీల్డ్ నుంచి అశ్విని సంపంగి సహా మరొకరు బరిలో నిలుస్తున్నారు. వరుణలో కాంగ్రెస్‌ నేత, మాజీ ముఖ్యమంత్రి సిద్ధరామయ్యపై పోటీ చేస్తున్న వి సోమన్న తన కుమారుడికి గుబ్బి నుంచి టిక్కెట్‌ ఇవ్వాలని కోరారు. అయితే గుబ్బి నియోజకవర్గం నుంచి ఎస్‌డీ దిలీప్‌కుమార్‌ను పార్టీ బరిలోకి దింపింది. బైందూరు ఎమ్మెల్యే సుకుమార్ శెట్టిని తప్పించి, గురురాజ్ గంటిహోళీ స్థానం నుంచి పోటీ చేయిస్తోంది బీజేపీ. అవినీతి ఆరోపణలపై అరెస్టయిన బీజేపీ ఎమ్మెల్యే మాదాల్ విరూపాక్షప్పను చన్నగిరి సిట్టింగ్ స్థానం నుంచి తప్పించారు. నామినేషన్ల పర్వం ఏప్రిల్ 13న ప్రారంభమై ఏప్రిల్ 20న ముగుస్తుంది.