మొక్కజొన్న రైతులకు కేసీఆర్ శుభవార్త; పంట కొనుగోలుకు ముందుకొచ్చిన ప్రభుత్వం
ఈ వార్తాకథనం ఏంటి
మొక్కజొన్న రైతులకు తెలంగాణ సీఎం కేసీఆర్ శుభవార్త చెప్పారు. యాసంగిలో పండించిన మొక్కజొన్న పంటను ప్రభుత్వమే కొనుగోలు చేస్తుందని కేసీఆర్ ప్రకటించారు. ఈ మేరకు అధికారులు ఆదేశాలు జారీ చేశారు.
యాసంగిలో తెలంగాణలో 6.50లక్షల ఎకరాల్లో మొక్కజొన్న పంటను రైతులు సాగు చేశారు. మొత్తం 17.37లక్షల టన్నుల పంట దిగుబడి వస్తుందని ప్రభుత్వం అంచనా వేసింది.
వాస్తవానికి సీజన్ మొదట్లో మొక్కజొన్నలకు ధర బాగానే ఉంది. ఆ తర్వాత తగ్గుతూ వస్తోంది. కేంద్రం ప్రకటించిన మద్దతు ధర(రూ.1962) కంటే రూ.400 నుంచి రూ.500 తక్కువ ధర పలుకుతోంది. దీంతో రైతులు ఆందోళన చెందుతున్నారు.
తెలంగాణ
మార్క్ ఫెడ్ ఆధ్వర్యంలో కొనుగోలు కేంద్రాల ఏర్పాటు
యాసంగిలో పండించిన మొక్కజొన్న క్వింటాల్ ధర తగ్గి రైతులు ఇబ్బంది పడుతున్న విషయాన్ని ప్రజాప్రతినిధులు సీఎం కేసీఆర్ దృష్టికి తీసుకెళ్లారు. వెంటనే స్పందించి సీఎం కేసీఆర్, మద్దతు ధరకు ప్రభుత్వమే కొనుగోలు చేస్తుందని ప్రకటించారు.
కొనుగోలు కేంద్రాలను వెంటనే ప్రారంభించాలని వ్యవసాయ శాఖను సీఎం ఆదేశించారు. దిగుబడి అంచనాను బట్టి మొక్కజొన్నలో కొనుగోలు కోసం బ్యాంకు గ్యారంటీ కోసం రూ.600కోట్ల ప్రతిపాదనలను రాష్ట్ర ప్రభుత్వానికి మార్క్ ఫెడ్ పంపింది.
అయితే ఆర్థిక శాఖ దీనికి ఆమోదం తెలిపిన వెంటనే కొనుగోలు కేంద్రాలను మార్క్ ఫెడ్ ప్రారంభించనుంది. కేసీఆర్ నిర్ణయంపై రైతులు హర్షం వ్యక్తం చేస్తున్నారు.