Telangana CM: తెలంగాణ సీఎంను ఈ రోజే ప్రకటిస్తామని ఖర్గే ప్రకటన.. దిల్లీకి భట్టి, ఉత్తమ్
తెలంగాణ ముఖ్యమంత్రి ఎవరనేదానిపై ఇంకా పీఠముడి వీడలేదు. అయితే గత రెండురోజులుగా కొనసాగుతున్న ఉత్కంఠకు మంగళవారం తెరపడుతుందని కాంగ్రెస్ చీఫ్ మల్లికార్జున ఖర్గే పేర్కొన్నారు. తెలంగాణ సీఎంకు ఈరోజే ప్రకటిస్తామని ఖర్గే వెల్లడించారు. ఖర్గే ఛాంబర్‌లో 'ఇండియా' కూటమి సమావేశం తర్వాత తెలంగాణ సీఎంపై ఏఐసీసీ పరిశీలకులు, డీకే శివకుమార్‌తో ఖర్గే సమావేశం కానున్నారు. ఈ సమావేశం తర్వాత ఖర్గే నేరుగా సీఎం అభ్యర్థిని ప్రకటిస్తారా? లేక డీకే శివకుమార్ హైదరబాద్ వచ్చి.. ఇక్కడ వెల్లడిస్తారా? అనేది తేలాల్సి ఉంది. సీఎం అభ్యర్థితో పాటు కొందరు మంత్రులను కూడా ప్రకటించే అవకాశం ఉందని ఏఐసీసీ వర్గాలు చెబుతున్నాయి.
ఖర్గేతో భేటీ కానున్న భట్టి, ఉత్తమ్
తెలంగాణ సీఎం అభ్యర్థిపై చర్చించేందుకు సీనియర్ నాయకులు మల్లు భట్టి విక్రమార్క, ఉత్తమ్ కుమార్ రెడ్డి దిల్లీకి వెళ్లారు. వీరద్దరూ ఖర్గేతో ప్రత్యేకంగా భేటీ కానున్నారు. ఇదిలా ఉంటే.. సోమవారం రాత్రే సీఎం ఎవరనేదాన్ని ఏఐసీసీ ఫైనల్ చేసినట్లు సమాచారం. మల్లికార్జున ఖర్గే, సోనియా గాంధీ, కేసీ వేణగోపాల్‌ నిన్న రాత్రే సీఎంను ఫైనల్ చేశారని కాంగ్రెస్ వర్గాలు చెబుతున్నాయి. ఈరోజు జరగనున్న సమావేశంలో మంత్రి వర్గ కూర్పుపైనే మాత్రమే చర్చించనున్నట్లు మరోవైపు ప్రచారం జరుగుతోంది. ఇందులో ఏది వాస్తవమో.. మంగళవారం సాయంత్రం లోగా క్లారిటీ వచ్చే అవకాశం ఉంది.
