Tamil Nadu: తిరువణ్ణామలై ఆలయ ప్రాంగణంలో నాన్ వెజ్ తిన్న వ్యక్తి.. అరెస్ట్ చేసిన పోలీసులు..
ఈ వార్తాకథనం ఏంటి
తమిళనాడులోని తిరువణ్ణామలైలో ఉన్న ప్రసిద్ధ అన్నామలై ఆలయంలో మాంసాహారంతో కూడిన ఆహారం తీసుకొచ్చిన ఘటన తీవ్ర ఉద్రిక్తతకు దారితీసింది.
ఆలయంలో నాల్గవ ప్రహారం (అంటే వెలుపల భాగం) వద్ద ఒక వ్యక్తి మాంసాహారం తింటున్నట్టు భక్తులు గమనించారు.
వెంటనే వారు ఆలయ అధికారులకు సమాచారం అందించారు.
తక్షణమే అక్కడికి వచ్చిన అధికారులు ఆ వ్యక్తిని ప్రశ్నించారు.
దీంతో అతడు స్పందిస్తూ.. తాను కేవలం 'కుస్కా' (ఉప్పు, మసాలా లేని బిర్యానీ) ఆర్డర్ చేసినప్పటికీ, అనుకోకుండా దానిలో చికెన్ ముక్కను కూడా పెట్టారని తెలిపాడు.
అయితే, ఈ వివరణతో సంతృప్తి చెందని అధికారులు అతని వద్దున్న ఆహారాన్ని స్వాధీనం చేసుకుని, దాన్ని ప్యాక్ చేయించి పోలీసులకు సమాచారం అందించారు.
వివరాలు
తీవ్రంగా స్పందించిన రాష్ట్ర బీజేపీ నేతలు
ఆ తర్వాత పోలీసులు విచారణ కోసం ఆ వ్యక్తిని అదుపులోకి తీసుకున్నారు.
ప్రస్తుతం ఈ ఘటనపై పోలీసులు విచారణ కొనసాగిస్తున్నారు. ఈ ఘటనపై రాష్ట్ర బీజేపీ నేతలు తీవ్రంగా స్పందించారు.
హిందూ సమాజ భావోద్వేగాలను ఉద్దేశపూర్వకంగా దెబ్బతీసేందుకు ఇటువంటి చర్యలు జరుగుతున్నాయని ఆరోపించారు.
ముఖ్యమంత్రి స్టాలిన్ నేతృత్వంలోని ప్రభుత్వం హిందువులను తక్కువచేసేలా వ్యవహరిస్తోందని వారు మండిపడ్డారు.
వివరాలు
జనవరిలో కూడా ఇలాంటి సంఘటనే
అయితే, జనవరిలో కూడా ఇలాంటి సంఘటనే జరిగింది. మధురై సమీపంలోని తిరుపరంకుండ్రం వద్ద ఇలాంటి కేసు ఒకటి చోటు చేసుకున్నదని గుర్తు చేశారు.
అప్పట్లో ఇండియన్ యూనియన్ ముస్లిం లీగ్ (ఐయూఎంఎల్) నేత,రామనాథపురం ఎంపీ నవాస్ ఖని, తిరుపరంకుండ్రం సుబ్రమణ్య స్వామి కొండ దగ్గర మాంసాహారం తిన్నారని బీజేపీ రాష్ట్ర అధ్యక్షుడు కె. అన్నామలై ఆరోపించారు.
అయితే, ఈ ఆరోపణలను ఎంపీ నవాస్ ఖని ఖండించారు. బీజేపీ తప్పుడు ప్రచారాల కోసం ముందుండే పార్టీ అని, ఈ ఆరోపణలు పూర్తిగా అసత్యమని ఆయన స్పష్టం చేశారు.