Medaram : మేడారం జాతర షెడ్యూల్ ఫిక్స్‌.. జనవరి 28 నుండి 31 వరకు ఆధ్యాత్మిక మహోత్సవం!
ఈ వార్తాకథనం ఏంటి
తెలంగాణ రాష్ట్రంలోని ములుగు జిల్లా మేడారంలో జరిగే మహాజాతర తేదీలు ఖరారయ్యాయి. స్థానిక పూజారుల సంఘం సభ్యులు సమావేశమై 2026లో జరగనున్న మహాజాతరకు సంబంధించి అధికారికంగా తేదీలను ప్రకటించారు. ఈ ప్రకారం జాతర జనవరి 28 నుంచి 31 వరకు నాలుగు రోజుల పాటు ఘనంగా జరగనుంది. జాతర ప్రారంభ దినమైన జనవరి 28న సాయంత్రం, సారలమ్మ తల్లి, గోవిందరాజు, పగిడిద్దరాజు గద్దెలకు చేరుకుంటారు. జనవరి 29న సాయంత్రం ముఖ్యదైవమైన సమ్మక్క తల్లి గద్దె చేరిక జరుగుతుంది. జనవరి 30న సమ్మక్క-సారలమ్మ అమ్మవార్లకు భక్తులు తమ మొక్కులు సమర్పించే పవిత్ర వేళగా నిలుస్తుంది. ఆ తరువాత జనవరి 31న అమ్మవార్లు గోవిందరాజు, పగిడిద్దరాజులతో కలిసి వనప్రవేశం చేస్తారు.
Details
లక్షలాది భక్తులు హాజరయ్యే అవకాశం
అంటే, భక్తులు వీక్షించగలిగే నాలుగు రోజుల ఉత్సవం ఇదే. ఈ నేపథ్యంలో పూజారులు ప్రభుత్వాన్ని ముందస్తుగా ఏర్పాట్లకు పూనుకోవాలని కోరారు. మేడారం మహాజాతరను ఆసియా ఖండంలో అతిపెద్ద గిరిజన జాతరగా గుర్తించారు. ప్రతి రెండేళ్లకోసారి జరిగే ఈ జాతరకు లక్షలాది భక్తులు హాజరవుతారు. ముఖ్యంగా గిరిజన ప్రజలు తమ ఆచార, సంప్రదాయాలను అనుసరించి అమ్మవార్లను పూజిస్తారు. సమ్మక్క-సారలమ్మ మహాజాతర గిరిజనుల సాహసాన్ని, ధైర్యాన్ని ప్రతిబింబిస్తుంది. ఈ జాతర ద్వారా ప్రకృతిపై ప్రేమ, సమాజంలోని సమగ్రతపై అవగాహన పెంపొందుతుంది. ప్రతి సారి మాదిరిగానే ప్రభుత్వం భారీ భద్రత, తాగునీరు, వైద్య సదుపాయాలు, రవాణా, శానిటేషన్ వంటి వసతులపై ప్రత్యేక దృష్టి పెట్టనుంది.