PM Narendra Modi: రియో డి జనీరోకు చేరుకున్న మోదీ.. ప్రపంచ నేతలతో కీలక సమావేశాలు!
ఈ వార్తాకథనం ఏంటి
ప్రధానమంత్రి నరేంద్ర మోదీ 17వ బ్రిక్స్ శిఖరాగ్ర సమావేశంలో పాల్గొనేందుకు బ్రెజిల్‌లోని రియో డి జనీరోకు చేరుకున్నారు. రియో గలేయో అంతర్జాతీయ విమానాశ్రయంలో ఆయనకు ఆత్మీయ స్వాగతం లభించింది. బ్రెజిల్ అధ్యక్షుడు లూయిజ్ ఇనాసియో లులా డ సిల్వా ఆహ్వానంతో మోదీ బ్రెజిల్ పర్యటనకు వెళ్లారు. ఇది రెండు దశల పర్యటనగా ఉండగా, మొదట ఆయన రియోలో బ్రిక్స్ సదస్సులో పాల్గొని అనంతరం బ్రెజిల్ రాజధాని బ్రెసిలియాకు రాష్ట్ర పర్యటన చేస్తారు. రియో డి జనీరోకు చేరుకున్న అనంతరం ప్రధాని మోదీ తన ఇన్‌స్టాగ్రామ్ ఖాతాలో భావోద్వేగపూరితంగా స్పందించారు. "బ్రెజిల్‌లోని రియో డి జనీరోకు వచ్చాను.ఇక్కడ నేను బ్రిక్స్ శిఖరాగ్ర సమావేశంలో పాల్గొంటాను. అధ్యక్షుడు లూలా ఆహ్వానంతో బ్రెసిలియాకు రాష్ట్ర పర్యటన చేస్తాను.
Details
భారత్-బ్రెజిల్ భాగస్వామ్యాన్ని బలోపేతం చేయడమే లక్ష్యం
ఈ పర్యటనలో ఫలవంతమైన చర్చలు, సమావేశాలు జరుగుతాయని ఆశిస్తున్నానని పేర్కొన్నారు. ఈ పర్యటనలో భాగంగా ప్రధాని మోదీ బ్రెజిల్ అధ్యక్షుడు లూలాతో ద్వైపాక్షిక సమావేశం నిర్వహించనున్నారు. భారత్-బ్రెజిల్ వ్యూహాత్మక భాగస్వామ్యాన్ని మరింత బలోపేతం చేయడమే ఈ చర్చల ప్రధాన ఉద్దేశ్యం. వాణిజ్యం, రక్షణ, శక్తి, అంతరిక్ష, సాంకేతికత, వ్యవసాయం, ఆరోగ్యం, ప్రజల పరస్పర సంబంధాలు వంటి కీలక రంగాల్లో భాగస్వామ్యాన్ని విస్తరించేందుకు ఇరు దేశాలు కృషి చేయనున్నాయి. ఈ నేపథ్యంలో ఈ సమావేశం ఎంతో ప్రాధాన్యతను సంతరించుకుంది. అదే సమయంలో రియో డి జనీరో వేదికగా జరుగుతున్న 17వ బ్రిక్స్ సదస్సులో ప్రధానమంత్రి మోదీ ఇతర దేశాధినేతలతో ద్వైపాక్షిక చర్చలు నిర్వహించనున్నారు.
Details
మోదీకి స్వాగతం పలకడం అదృష్టంగా ఉంది
బ్రిక్స్ సమూహంలో మొదట బ్రెజిల్, రష్యా, భారత్, చైనా, దక్షిణాఫ్రికా సభ్యులుగా ఉండగా, తరువాత సౌదీ అరేబియా, ఈజిప్ట్, యునైటెడ్ అరబ్ ఎమిరేట్స్, ఇథియోపియా, ఇండోనేషియా, ఇరాన్ వంటి దేశాలు చేరి ఈ కూటమిని బలపరిచాయి. అభివృద్ధి చెందుతున్న ఆర్థిక వ్యవస్థల శక్తివంతమైన మైలురాయిగా బ్రిక్స్ ఎదిగింది. ఇదిలా ఉండగా, బ్రెజిల్‌లో నివసిస్తున్న భారతీయులందరూ ప్రధానమంత్రి పర్యటనను ఎంతో ఉత్సాహంగా ఎదురుచూస్తున్నారు. ప్రవాస భారతీయుడు విజయ్ సోలంకి మాట్లాడుతూ నేను గుజరాత్ నుంచి వచ్చాను. చాలా కాలంగా బ్రెజిల్‌లో ఉంటున్నాను. ఈరోజు మన ప్రధానమంత్రి మోదీకి స్వాగతం పలకడం మన అదృష్టంగా భావిస్తున్నాం. ఇది ఎంతో గర్వంగా, గౌరవంగా అనిపిస్తోందని చెప్పాడు.