Constitution Day: రాజ్యాంగ విధుల‌ను స‌క్ర‌మంగా నిర్వర్తించండి..దేశ పౌరుల‌కు ప్రధాని మోదీ లేఖ
ఈ వార్తాకథనం ఏంటి
దేశంలోని ప్రతి పౌరుడు రాజ్యాంగం సూచించిన బాధ్యతలను పాటించాలని ప్రధాని నరేంద్ర మోదీ పిలుపునిచ్చారు. ప్రజాస్వామ్యం పటిష్టంగా నిలవడానికి పౌర కర్తవ్యాలే బలం అని ఆయన పేర్కొన్నారు. రాజ్యాంగ దినోత్సవ సందర్భంలో దేశ ప్రజలకు పంపిన సందేశంలో ఈ విషయాలు వెల్లడించారు. ఓటు హక్కును వినియోగించడం ద్వారా ప్రజాస్వామ్య వ్యవస్థను మరింత బలపరచే బాధ్యతను ప్రతి ఓటరుడు నిర్వర్తించాలని ఆయన చెప్పారు. 18 సంవత్సరాలు పూర్తిచేసుకుని తొలిసారిగా ఓటర్లు అవుతున్న యువతను రాజ్యాంగ దినోత్సవం నాడు ప్రత్యేకంగా సత్కరించాలని సూచించారు. కర్తవ్యాలను నిబద్ధతతో పోషించినప్పుడే హక్కులు లభిస్తాయని మహాత్మా గాంధీజీ నమ్మకాన్ని ఆయన మరోసారి గుర్తు చేశారు.
వివరాలు
ప్రతి పౌరుడు తన రాజ్యాంగబద్ధ కర్తవ్యాలను అమలు చేయాలి: మోదీ
సామాజిక-ఆర్థిక ఎదుగుదలకు పౌర బాధ్యతల నిర్వర్తన ప్రధాన పాత్ర పోషిస్తుందని ప్రధాని అన్నారు. ఈ తరం తీసుకునే నిర్ణయాలు, అమలు చేసే విధానాలు భవిష్యత్ తరాల జీవితాలను ప్రభావితం చేస్తాయని గుర్తు చేశారు. వికసిత్ భారత్ లక్ష్యాన్ని దృష్టిలో ఉంచుకుని ప్రతి పౌరుడు తన రాజ్యాంగబద్ధ కర్తవ్యాలను అమలు చేయాలని పిలుపునిచ్చారు. మన రాజ్యాంగం మానవ గౌరవం, సమానత్వం, స్వేచ్ఛకు ప్రాధాన్యతనిస్తూ, మనకు హక్కులను ప్రసాదించడంతో పాటు బాధ్యతలను కూడా నిర్దేశిస్తుందని, ఆ విధుల్ని ఎప్పుడు మరవకుండా నిలబెట్టుకోవాలని ఆయన ఎక్స్‌లో చేసిన పోస్టులో పేర్కొన్నారు. ఈ సందర్భంగా రాజ్యాంగ రూపకర్తలకు ఆయన వినమ్ర నివాళి అర్పించారు. వారి దూరదృష్టి, విలువలు, ప్రతిబద్ధతే వికసిత్ భారత్ సాధనకు ప్రేరణగా నిలుస్తాయని ప్రధాని తెలిపారు.