దేశ రాజధాని దిల్లీలో ఘోరం.. భార్య, కుమారుడి ముందే భర్త దారుణ హత్య
దేశ రాజధాని దిల్లీలో ఘోరం చోటు చేసుకుంది. చిన్న గొడవ కాస్త ముదిరి వ్యక్తిగత ద్వేషంగా మారి ఓ వ్యక్తి హత్యకు దారి తీసింది. అంతేకాకుండా అతని కుటుంబాన్ని ఆస్పత్రి పాలు చేసింది. అలీ విహార్‌ ప్రాంతంలో నివాసం ఉండే అర్వింద్ మండల్ శుక్రవారం సాయంత్రం తన కుమారుడ్ని పాఠశాల నుంచి ఇంటికి తీసుకొస్తున్నారు. ఈ క్రమంలో ఓ వ్యక్తి సదరు బాలుడిని ఉద్దేశించి దూషించాడు. దీంతో అతనిపై అర్వింద్ మండిపడ్డారు. అనంతరం కుమారిడితో కలిసి ఇంటికి వెళ్తుండగా నిందితుడు తన స్నేహితులతో కలిసి అడ్డగించాడు. కొంతసేపు వాగ్వాదం తర్వాత స్థానికులు జోక్యం చేసుకోవడంతో మాటల యుద్ధం సద్దుమణిగింది.
నిందితులను అరెస్ట్ చేసిన దిల్లీ పోలీసులు
అర్వింద్ మండల్ అదే రోజు రాత్రి 9.40 గంటల సమయంలో ఇంటి ముందు నిలబడి ఉన్నారు. గమనించిన నిందితుడు తన స్నేహితులతో కలిసి బైకులపై వచ్చి కత్తులతో 15 సార్లు విచక్షణారహితంగా పొడిచారు. ఘర్షణలో భర్తను రక్షించుకునేందుకు వెళ్లిన భార్య రేఖా మండల్‌ను రాడ్డుతో తలపై మోదారు. వెంటనే స్థానికులు పోలీసులకు సమాచారం అందించారు. పోలీసులు వచ్చే సరికే నిందితులు అక్కడ్నుంచి జారుకున్నారు. తీవ్ర గాయాలపాలైన అర్వింద్ మండల్, రేఖా మండల్ దంపతులను పోలీసులు ఆస్పత్రికి తరలించగా, అక్కడ చికిత్స పొందుతూ అర్వింద్ తుదిశ్వాస విడిచారు. మరోవైపు రేఖా మండల్ పరిస్థితి విషమంగా ఉందని వైద్యులు ప్రకటించారు. దీనిపై కేసు నమోదు చేసుకున్న పోలీసులు నలుగురు నిందితులను అదుపులోకి తీసుకుని దర్యాప్తు చేస్తున్నారు.
ఈ టైమ్ లైన్ ని షేర్ చేయండి