South Coast Railway Zone: నెల రోజుల్లో కొత్త రైల్వేజోన్‌ నోటిఫికేషన్.. డిసెంబరు లేదా సంక్రాంతికి అపాయింటెడ్‌ డే?
ఈ వార్తాకథనం ఏంటి
విశాఖపట్టణం కేంద్రంగా కొత్త దక్షిణ కోస్తా రైల్వే జోన్ స్థాపన ప్రక్రియ వేగవంతమవుతోంది. జూన్‌లోనే రైల్వే బోర్డు ఈ కొత్త జోన్‌కు జీఎమ్‌గా సందీప్ మాథూర్‌ను నియమించింది. ఇప్పుడు విభాగాధిపతుల (PHoDs) నియామక పనులు కూడా చురుకుగా జరుగుతున్నాయి. ఈ క్రమంలో, బుధవారం ప్రిన్సిపల్ చీఫ్ ఎలక్ట్రికల్ ఇంజినీర్ (PCEE)గా ఏపీ శర్మ నియమితులయ్యారు. అంతకుముందు ప్రిన్సిపల్ చీఫ్ మెకానికల్ ఇంజినీర్ (PCME)గా అమిత్ గుప్తాకు పోస్టింగ్ ఇచ్చారు. ఫైనాన్స్ విభాగ బాధ్యతలు ప్రస్తుతం తూర్పు కోస్తా జోన్‌లో ఉన్న ఒక అధికారి వద్ద అదనపు హోదాగా కొనసాగుతున్నాయి. ఈ విధంగా వరుసగా కీలక నియామకాలు జరుగుతున్నాయి. మిగతా విభాగాలకు సంబంధించిన PHoDs నియామకాలు కూడా త్వరలో పూర్తి కానున్నట్లు సమాచారం.
వివరాలు
3-4 నెలల్లో అపాయింట్‌మెంట్ డే
PHoDs నియామక ప్రక్రియ పూర్తవగానే,దక్షిణ మధ్య రైల్వే పునర్విభజనతో పాటు దక్షిణ కోస్తా జోన్ స్థాపనపై అధికారిక నోటిఫికేషన్ వెలువడనుంది. రైల్వే వర్గాల అంచనాల ప్రకారం,ఈ నోటిఫికేషన్ ఆగస్టు చివరి వారంలో లేదా సెప్టెంబర్ మొదటి వారంలో వచ్చే అవకాశముంది. నోటిఫికేషన్ వెలువడిన 3-4 నెలల్లో 'అపాయింట్‌మెంట్ డే' ప్రకటిస్తారని ఒక ఉన్నతాధికారి 'ప్రముఖ మీడియా'కి వెల్లడించారు. ఆ రోజు నుంచే దక్షిణ మధ్య రైల్వే,దక్షిణ కోస్తా జోన్‌ల కార్యకలాపాలు వేర్వేరుగా కొనసాగుతాయి. రైల్వే అధికారులు అంచనా వేసిన ప్రకారం,ఈ అపాయింట్‌మెంట్ డే వచ్చే డిసెంబర్‌లో లేదా సంక్రాంతి సమయానికి (జనవరిలో)ఉండే అవకాశముంది. ఈ లోపు ఆపరేషన్స్,కమర్షియల్,భద్రత,విజిలెన్స్,ఆర్పీఎఫ్,సివిల్ ఇంజినీరింగ్, కన్స్ట్రక్షన్, సిగ్నల్-టెలికాం, పర్సనల్, స్టోర్స్ వంటి విభాగాలకి PHoDs నియామకం జరగాల్సి ఉంది.
వివరాలు
విభజన తర్వాత రైల్వే నిర్మాణం
విభజన అనంతరం, దక్షిణ మధ్య రైల్వే పరిధిలో ప్రస్తుతం ఉన్న మూడు డివిజన్లు అలాగే ఉండగా, భువనేశ్వర్ కేంద్రంగా ఉన్న తూర్పు కోస్తా జోన్‌లోని కొంతభాగాన్ని కలిపి విశాఖపట్నం కేంద్రంగా దక్షిణ కోస్తా జోన్ ఏర్పడనుంది. ఈ మార్పుతో, దక్షిణ మధ్య రైల్వేలోని ప్రస్తుతం ఉన్న 6 డివిజన్లు మూడుకు పరిమితమవుతాయి.
వివరాలు
కీలక మార్పులు - సెక్షన్ల బదిలీలు
రాయచూరు-వాడి సెక్షన్ (108 కి.మీ.): ప్రస్తుతం గుంతకల్లు డివిజన్‌లో ఉన్న ఈ మార్గాన్ని సికింద్రాబాద్ డివిజన్‌కు బదిలీ చేయాలని రైల్వే బోర్డు నిర్ణయించింది. దీనితో, కర్ణాటక నుండి సికింద్రాబాద్‌కు వచ్చే రైళ్ల జోన్ ఇంటర్‌ఛేంజ్ పాయింట్లు రెండులోనుండి ఒకదానికి తగ్గుతాయి. అలాగే యడ్లాపూర్, యెమరాస్‌లోని థర్మల్ స్టేషన్లకు బొగ్గు రవాణా మరింత సులభతరం అవుతుంది. విష్ణుపురం-పగిడిపల్లి, విష్ణుపురం-జాన్‌పహాడ్ (142 కి.మీ.): ప్రస్తుతం గుంటూరు డివిజన్ పరిధిలో ఉన్న ఈ రెండు సెక్షన్లు సికింద్రాబాద్ డివిజన్‌కు బదిలీ అవుతాయి. దీంతో సింగరేణి ప్రాంతం నుండి విష్ణుపురం వరకు బొగ్గు రవాణా నిరంతరాయంగా కొనసాగుతుంది.
వివరాలు
కీలక మార్పులు - సెక్షన్ల బదిలీలు
కొండపల్లి-మోటుమర్రి (46 కి.మీ.): ఈ సెక్షన్ సికింద్రాబాద్ డివిజన్ నుండి విజయవాడ డివిజన్‌కు బదిలీ కానుంది. ఫలితంగా, కొండపల్లి నార్ల తాతారావు పవర్ ప్లాంట్‌కు బొగ్గు రవాణా మరింత సాఫీగా సాగుతుంది.