'భయపడి జన్ ఆశీర్వాద యాత్రకు నన్ను ఆహ్వానించలేదు'.. బీజేపీపై ఉమాభారతి కామెంట్
ఈ వార్తాకథనం ఏంటి
మధ్యప్రదేశ్‌లో బీజేపీ జన్ ఆశీర్వాద యాత్రకు ఆహ్వానం అందకపోవడంపై మాజీ ముఖ్యమంత్రి, పార్టీ ఫైర్ బ్రాండ్ ఉమాభారతి ఆవేదన వ్యక్తం చేశారు.
తనను జన్ ఆశీర్వాద యాత్రకు ఆహ్వానించలేదని పేర్కొన్నారు. కనీసం సమాచారమైనా ఇచ్చి ఉండాల్సిందని ఉమాభారతి అన్నారు.
తాను జన్ ఆశీర్వాద యాత్రలో ఉంటే, ప్రజల దృష్టి మొత్తం తనపైనే ఉంటుందని బీజేపీ నాయకులు భయపడి ఉండవచ్చని ఆమె చెప్పుకొచ్చారు.
జ్యోతిరాదిత్య సింధియా 2020లో మధ్యప్రదేశ్‌లో బీజేపీ ప్రభుత్వాన్ని ఏర్పాటు చేయడంలో సహాయం చేస్తే, తాను కూడా 2003లో పార్టీని ఎక్కువ సీట్లలో గెలిపించి, ప్రభుత్వాన్ని ఏర్పాటు చేయడంలో సహకరించినట్లు వెల్లడించారు.
మధ్యప్రదేశ్‌లో బీజేపీ జన్ ఆశీర్వాద యాత్రను ఆదివారం పార్టీ అధ్యక్షుడు జేపీ నడ్డా ప్రారంభించారు.
బీజేపీ
బీజేపీ సీనియర్లను అవమానిస్తోంది: కాంగ్రెస్
జన్ ఆశీర్వాద యాత్రకు తనకు ఆహ్వానం అందనప్పటికీ రాబోయే ఎన్నికల్లో బీజేపీకి ప్రచారం చేస్తానని ఉమాభారతి స్పష్టం చేశారు.
ఉమాభారతి ఒకప్పుడు పార్టీ సీనియర్ నేత ఎల్‌కె అద్వానీకి విధేయురాలుగా ఉండేవారు. ఉమాభారతిని ఎందుకు ఆహ్వానించలేదనే విషయంపై బీజేపీ ఇంకా స్పందించలేదు.
బీజేపీ ఎదుగుదలలో కీలకమైన రామజన్మ భూమి ఉద్యమంలో అగ్రభాగాన నిలిచిన నేతల్లో ఉమాభారతి ఒకరు.
అంతటి సీనియర్ నేతను పక్కన పెట్టడంపై కాంగ్రెస్ స్పందించింది. కావాలనే సీనియర్లను బీజేపీ అవమానిస్తోందని కాంగ్రెస్ నేత రణ్‌దీప్ సూర్జేవాలా అన్నారు.
మాజీ ఉపప్రధాని అద్వానీ, మురళీ మనోహర్‌ జోషీని కూడా పార్టీ పక్కన పెట్టిందన్నారు. భారతీయ సంస్కృతిలో పెద్దలను గౌరవించని వారిని దేవుడు కూడా క్షమించడని సూర్జేవాలా పేర్కొన్నారు.