ఆంధ్రప్రదేశ్‌‌కు కేంద్రం షాక్: ప్రత్యేక హోదా డిమాండ్‌ను పరిగణలోకి తీసుకోబోమని నిర్మల ప్రకటన
ఈ వార్తాకథనం ఏంటి
ఇక నుంచి ఏ రాష్ట్రం విషయంలో కూడా ప్రత్యేక హోదా డిమాండ్‌ను కేంద్రం పరిగణనలోకి తీసుకోదని కేంద్ర ఆర్థిక మంత్రి నిర్మలా సీతారామన్ స్పష్టం చేశారు. దీంతో చాలా ఏళ్లుగా ప్రత్యేక హోదా డిమాండ్ చేస్తున్న ఆంధ్రప్రదేశ్, ఒడిశా, బిహార్ వంటి రాష్ట్రాలకు ఇది ఎదురు దెబ్బే అని విశ్లేషకులు అభిప్రాయపడుతున్నారు.
ఒడిశా చేస్తున్న ప్రత్యేక హోదా డిమాండ్‌ను కేంద్రం పరిగణనలోకి తీసుకుంటుందా? అని అడిగిన ప్రశ్నకు పై విధంగా నిర్మలా సీతారామన్ పేర్కొన్నారు. 14వ ఫైనాన్స్ కమిషన్ ప్రకారం ప్రత్యేక హోదా ఇవ్వలేమని స్పష్టం చేశారు.
రాష్ట్ర విభజన జరిగిన సమయంలో ఆంధ్రప్రదేశ్, తెలంగాణకు ప్రత్యేక హోదా కల్పించినా, ఆర్థిక సంఘం సూచన మేరకు ఉపసంహరించుకున్నట్లు చెప్పారు.
ప్రత్యేక హోదా
90:10 నిష్పత్తిలో నిధులు ఇవ్వాలి: బీజేడీ
ఒడిశా, బిహార్ రాష్ట్రాలు ఎప్పటి నుంచో ప్రత్యేక హోదాను డిమాండ్ చేస్తున్నాయి. ముఖ్యంగా ఒడిశా రాష్ట్రం ప్రకృతి విపత్తులకు గురికావడం వల్ల కేంద్రం ఆదుకోవాలని బీజేడీ డిమాండ్ చేస్తోంది.
ఇదే విషయాన్ని ఇటీవల బీజేడీ ఎంపీ సస్మిత్ కూడా పార్లమెంట్‌లో ప్రస్తావించారు. ఒడిశాలో తుఫాను వచ్చినప్పుడల్లా ఇళ్లు దెబ్బతింటున్నాయని, పంటలు నాశనమవుతున్నాయని, అటువంటి విపత్తు సంభవించినప్పుడు, కేంద్రం మూడేళ్లపాటు ప్రత్యేక హోదా ఇవ్వాలని డిమాండ్ చేశారు. 90:10 నిష్పత్తిలో నిధులు ఇవ్వాలని కోరారు.
గతేడాది ఆగస్టులో నీతి ఆయోగ్ పాలక మండలి సమావేశంలో సీఎం నవీన్ పట్నాయక్ కూడా ఈ అంశాన్ని లేవనెత్తారు.
బీహార్ సీఎం నితీశ్ కుమార్ కూడా తమ రాష్ట్రానికి ప్రత్యేక హోదా కోసం పట్టుబడుతున్నారు.