Trishna Ray: మిస్ టీన్ యూనివర్స్ 2024 కిరీటాన్ని కైవసం చేసుకున్న తృష్ణా రే
ఈ వార్తాకథనం ఏంటి
భారత్‌కు చెందిన తృష్ణా రే ఈ ఏడాది 'మిస్ టీన్ యూనివర్స్' కిరీటాన్ని దక్కించుకున్నారు.
దక్షిణాఫ్రికాలోని క్లింబరీ వేదికగా జరిగిన ఈ పోటీల్లో ఆమె విజేతగా నిలిచారు. ఈ పోటీల్లో పెరూ, దక్షిణాఫ్రికా, బ్రెజిల్‌, కెన్యా, పోర్చుగల్‌, నమీబియా, నెదర్లాండ్స్ వంటి దేశాలకు చెందిన అనేక అందగత్తెలు పాల్గొన్నారు.
వారి మధ్య 19 ఏళ్ల తృష్ణా రే తన ప్రత్యేకతతో ముందుకు సాగి, మిస్ టీన్ యూనివర్స్ కిరీటాన్ని గెలుచుకున్నారు.
పెరూకు చెందిన అన్నే థోర్సెన్‌, నమీబియాకు చెందిన ప్రెషియస్‌ ఆండ్రీ వరుసగా రెండో, మూడో స్థానాలను సాధించారు.
ఒడిశా రాష్ట్రానికి చెందిన తృష్ణా రే, కల్నల్‌ దిలీప్‌ కుమార్‌ రే, రాజశ్రీ రేల కుమార్తె.
వివరాలు
దేశానికి గర్వకారణం
ప్రస్తుతం తృష్ణా భువనేశ్వర్‌లో కేఐఐటీ యూనివర్సిటీలో ఫ్యాషన్ టెక్నాలజీ చదువుతున్నారు.
గత ఏప్రిల్‌లో జరిగిన మిస్ టీన్ యానివర్స్‌ ఇండియా పోటీల్లో ఆమె విజేతగా నిలిచారు, తద్వారా ఇప్పుడు అంతర్జాతీయ స్థాయిలో కూడా ఘన విజయం సాధించారు.
ఈ పోటీలకు సంబంధించిన వీడియోను నిర్వాహకులు సామాజిక మాధ్యమాల్లో షేర్‌ చేయగా, పలువురు నెటిజన్‌లు సంతోషాన్ని వ్యక్తం చేస్తున్నారు.
కేఐఐటీ ఇన్‌స్టిట్యూట్ కూడా తమ అధికారిక వెబ్‌సైట్‌లో తృష్ణా విజయాన్ని ప్రశంసిస్తూ, ఇది దేశానికి గర్వకారణమని పేర్కొంది.