Vishakhapatnam: విశాఖలో మరో నాలుగు ప్రఖ్యాత సంస్థలు.. భారీ పెట్టుబడులు, 50 వేలకు పైగా ఉద్యోగాలు

వ్రాసిన వారు Sirish Praharaju

Jul 24, 2025

02:29 pm

ఈ వార్తాకథనం ఏంటి

గత ఐదేళ్లలో రాష్ట్రంలో 20 లక్షల ఉద్యోగాల సృష్టించడమే లక్ష్యంగా కూటమి ప్రభుత్వం నిరంతరం కృషి చేస్తోంది. ఈ ప్రణాళికను అమలు చేయడంలో భాగంగా మంత్రి నారా లోకేశ్ నేతృత్వంలోని మంత్రివర్గ ఉపసంఘం వివిధ కంపెనీలను రాష్ట్రంలో పెట్టుబడులు పెట్టేలా ఆకర్షించేందుకు చురుకైన పాత్ర పోషిస్తోంది.

వివరాలు

మరో నాలుగు సంస్థలు ముందుకు

ఇప్పటికే పలు ప్రముఖ సంస్థలను రాష్ట్రానికి తీసుకురావడంలో విజయవంతమైన ప్రభుత్వం, తాజాగా మరో నాలుగు ప్రతిష్ఠాత్మక సంస్థలను కూడా విశాఖలో పెట్టుబడులు పెట్టేందుకు ఒప్పించగలిగింది. ఇందులో సిఫీ,సత్వా,బీవీఎం,ఏఎన్ఎస్ఆర్ సంస్థలు కలవగా, మొత్తం రూ.20,216 కోట్ల పెట్టుబడులు వెచ్చించేందుకు ఈ సంస్థలు అంగీకరించాయి. ముఖ్యమంత్రి చంద్రబాబు నాయుడు అధ్యక్షతన జరిగిన 9వ ఎస్‌ఐపిబి సమావేశంలో ఈ ప్రతిపాదనలకు ఆమోదం లభించింది. ఈ పెట్టుబడుల ఫలితంగా మొత్తం 50,600 మందికి ఉపాధి అవకాశాలు ఏర్పడనున్నాయి. ఈ సందర్భంగా నారా లోకేష్, పెట్టుబడులపై సమగ్రమైన వివరాలను సమర్పించారు. విశాఖ నగరం అభివృద్ధికి ఈ సంస్థల రాక మేలుఫలితాలు తీసుకొస్తుందని ఆయన అభిప్రాయపడ్డారు. సంస్థల స్థితిగతులు, పెట్టుబడుల లక్ష్యాలు, వాటి బలహీనతలు తదితర అంశాలను ఈ సందర్భంగా వెల్లడించారు.

వివరాలు

భవిష్యత్ దృష్టితో మాస్టర్ ప్లాన్

ముఖ్యమంత్రి చంద్రబాబు మాట్లాడుతూ,భవిష్యత్ అవసరాల్ని దృష్టిలో పెట్టుకుని విశాఖకు సమగ్ర మాస్టర్ ప్లాన్ ఉండాల్సిన అవసరం ఉందని చెప్పారు. నగరంలో భూముల లభ్యత తక్కువగా ఉండటాన్ని ఆయన ప్రస్తావిస్తూ,ఇప్పటికే అర్సెలర్ మిట్టల్ స్టీల్ ప్లాంట్ వంటి సంస్థలకు స్థలాలు కేటాయించామని,ఇకపై కూడా తగిన భూమిని చూపించేందుకు చర్యలు తీసుకోవాలని పేర్కొన్నారు. అలాగే మౌలిక సదుపాయాల లోపం లేకుండా ముందస్తు ప్రణాళికతో ముందుకెళ్లాలని అధికారులను ఆదేశించారు. ఈ సందర్భంగా అధికారులు పూణె, బెంగళూరు వంటి నగరాల్లో ట్రాఫిక్,మౌలిక వసతుల సమస్యలను ప్రస్తావించగా,అలాంటి సమస్యలు విశాఖలో ఉత్పన్నం కాకుండా చూసుకోవాలని ముఖ్యమంత్రి సూచించారు. విమానాశ్రయం, రైలు, హైవే రోడ్లు, మెట్రో వంటి కనెక్టివిటీపై ముందస్తుగా దృష్టి సారించాలని సూచించారు.

వివరాలు

కంపెనీల వివరాలు:

కంపెనీలతో పాటు, స్థానిక ప్రజలు నివసించేందుకు అవసరమైన జీవవాతావరణ వ్యవస్థ (ఎకోసిస్టం) ఉండేలా ప్రణాళికలు రూపొందించాలని ముఖ్యమంత్రి స్పష్టం చేశారు. 1. సిఫీ ఇన్ఫినిట్ స్పేసెస్ లిమిటెడ్: విశాఖలో తొలి దశగా రూ.1,466 కోట్ల పెట్టుబడి పెట్టనుంది. దీని ద్వారా 200 మందికి ఉద్యోగాలు లభిస్తాయి.రెండో దశలో రూ.15,000 కోట్ల పెట్టుబడితో మరో 400 ఉద్యోగాలు కల్పించనుంది. ఈ సంస్థ ఐటీ రంగంలో ప్రముఖమైన సిఫీ టెక్నాలజీస్‌కు చెందినదిగా ఉంది. సిఫీ టెక్నాలజీస్ రూ.3,621 కోట్ల టర్నోవర్ కలిగి ఉండగా, ఇన్ఫినిట్ స్పేసెస్ రూ.1,114 కోట్ల టర్నోవర్ కలిగి ఉంది. ఈ ఏడాది అక్టోబర్ నుంచి కార్యకలాపాలు ప్రారంభం కానున్నాయి.

వివరాలు

2. సత్వా డెవలపర్స్ ప్రైవేట్ లిమిటెడ్:

విశాఖ మధురవాడ ప్రాంతంలో రూ.1,500 కోట్ల పెట్టుబడిని వెచ్చించనుంది. దీని ద్వారా 25,000 మందికి ఉద్యోగాలు లభించనున్నాయి. ఈ సంస్థ దేశవ్యాప్తంగా ఎనిమిది నగరాల్లో కార్యకలాపాలు నిర్వహిస్తోంది. మొత్తం 80 మిలియన్ చదరపు అడుగుల ఆఫీస్ స్పేస్ అభివృద్ధిలో నిమగ్నంగా ఉంది. 3. బీవీఎం ఎనర్జీ & రెసిడెన్సీ ప్రైవేట్ లిమిటెడ్: విశాఖ ఎండాడలో రూ.1,250 కోట్ల పెట్టుబడితో మినీ స్మార్ట్ టెక్ సిటీ ఏర్పాటు చేయనుంది. దీనివల్ల 15,000 మందికి ఉపాధి కలుగుతుంది. గ్రేడ్-ఏ ప్లస్ కార్యాలయాలు, కోవర్కింగ్ స్పేస్, ఉద్యోగుల నివాస వసతులు ఏర్పాటు చేయనున్న ఈ సంస్థ, కపిల్ గ్రూప్‌కు చెందినది. ఫైనాన్షియల్ సేవలు, స్టార్ హోటల్స్, ఐటీ పార్కుల అభివృద్ధిలో గతంలో అనుభవం ఉన్న సంస్థ ఇది.

వివరాలు

4. ఏఎన్ఎస్ఆర్ గ్లోబల్ కార్పొరేషన్ ప్రైవేట్ లిమిటెడ్:

మధురవాడలో రూ.1,000 కోట్ల పెట్టుబడి పెట్టనుంది. దీని ద్వారా 10,000 మందికి ఉద్యోగావకాశాలు కలుగుతాయి. జీసీసీ ఆపరేషన్, డిజైన్ రంగాల్లో మార్కెట్ లీడర్‌గా ఉన్న ఈ సంస్థ, ఇండియాతో పాటు పోలాండ్, యూఏఈ దేశాల్లో కార్యకలాపాలు సాగిస్తోంది. ఈ సంస్థకు 1.5 లక్షల ఉద్యోగులు, 12 మిలియన్ చదరపు అడుగుల కార్యాలయ ప్రాంగణం ఉంది.

వివరాలు

ఇప్పటివరకు ఎస్ఐపిబి ఆమోదించిన ప్రాజెక్టులు:

ప్రస్తుతం వరకూ జరిగిన ఎస్ఐపిబి సమావేశాల్లో మొత్తం 113 ప్రాజెక్టులు ఆమోదం పొందాయి. ఇందులో: 46 ప్రాజెక్టులు పారిశ్రామిక రంగానికి, 41 ప్రాజెక్టులు ఇంధన రంగానికి, 11 పర్యాటక రంగానికి, 11 ఐటీ రంగానికి, 4 ఫుడ్ ప్రాసెసింగ్ రంగానికి చెందినవిగా ఉన్నాయి.