Private sector: రూపాయి పతనం ఎఫెక్ట్.. ఉద్యోగాలపై అనిశ్చితి… పది నెలల్లో అత్యల్ప స్థాయికి ప్రైవేట్ రంగం
ఈ వార్తాకథనం ఏంటి
డాలర్తో పోలిస్తే రూపాయి చరిత్రలోనే కనిష్ఠ స్థాయి అయిన 91.8కి పడిపోయిన వేళ, ప్రైవేట్ రంగం కూడా తీవ్ర ఒత్తిడిని ఎదుర్కొంటోంది. సంవత్సరం ముగింపు దశలో బహుళజాతి సంస్థలు కఠినమైన నిబంధనలు అమలు చేయడంతో విస్తరణ వేగం తగ్గింది. డిసెంబరులో ప్రైవేట్ రంగ కార్యకలాపాలు గత పది నెలల్లోనే అత్యంత మందగించిన స్థాయికి చేరాయని మంగళవారం రాయిటర్స్ నిర్వహించిన సర్వే వెల్లడించింది. ఆర్థిక వృద్ధి బలహీనపడటం, ఉద్యోగ మార్కెట్ స్థబ్దత కారణంగా దేశీయ డిమాండ్ కూడా చల్లబడుతోందని గణాంకాలు సూచిస్తున్నాయి. ఈ పరిస్థితి మొత్తం ఆర్థిక వ్యవస్థపై ప్రభావం చూపుతోందని నిపుణులు చెబుతున్నారు.
వివరాలు
వస్తువుల ఉత్పత్తి రంగంలోనే కొరత
ఎస్ & పీ గ్లోబల్ రూపొందించిన హెచ్ఎస్బీసీ ఫ్లాష్ ఇండియా కాంపోజిట్ పర్చేసింగ్ మేనేజర్స్ ఇండెక్స్ (PMI) నవంబరులో 59.7గా ఉండగా, డిసెంబరులో 58.9కి తగ్గింది. వృద్ధి, క్షీణత మధ్య సరిహద్దైన 50 కంటే ఇది ఇంకా ఎక్కువగానే ఉన్నప్పటికీ, ఫిబ్రవరి తర్వాత ఇదే అత్యల్ప స్థాయి కావడం గమనార్హం. వస్తువుల ఉత్పత్తి రంగంలోనే కొరత ఎక్కువగా కనిపించింది. పరిశ్రమ ఆరోగ్యం గత రెండేళ్లలోనే అత్యంత నెమ్మదిగా మెరుగుపడింది. తయారీ రంగ PMI 56.6 నుంచి 55.7కి పడిపోయింది. సేవల రంగ సూచీ కూడా 59.8 నుంచి 59.1కి తగ్గి, ప్రధాన రంగంలో వృద్ధి బలహీనపడినట్లు చూపించింది.
వివరాలు
నిలిచిపోయిన నియామకాలు
ఉద్యోగుల నియామకం 2024 తర్వాత అత్యంత బలహీన స్థాయికి చేరింది. ప్రస్తుతం ఉన్న పనులకు ఉన్న సిబ్బంది సరిపోతున్నారని చాలా కంపెనీలు భావించడంతో కొత్తగా నియామకాలు చేపట్టలేదు. దీంతో సిబ్బంది సంఖ్యలో ఎలాంటి మార్పు లేకుండానే పరిస్థితి కొనసాగింది. నియామకాలపై విరామం పడటం, నిరుద్యోగం పెరిగే సూచనలు కనిపించడంతో వ్యాపార వర్గాల్లో ఆశావాదం గణనీయంగా తగ్గింది. వ్యాపార ఉత్సాహం వరుసగా మూడో నెల తగ్గుతూ, జూలై 2022 తర్వాతి కనిష్ఠ స్థాయికి చేరింది.
వివరాలు
ద్రవ్యోల్బణ ఒత్తిళ్లు
సేవల రంగంలో వచ్చిన మందగమనం పనిచేసే యువత ఆశలపై నీళ్లు చల్లినట్లయ్యింది. భవిష్యత్ వృద్ధిపై కూడా అనిశ్చితి నెలకొంది. "సంవత్సరం చివర్లో ద్రవ్యోల్బణ ఒత్తిళ్లు అదుపులో ఉండటం కంపెనీలకు కొంత ఊరటనిచ్చింది," అని ఎస్ & పీ గ్లోబల్ మార్కెట్ ఇంటెలిజెన్స్ ఆర్థిక విభాగ డైరెక్టర్ ఆండ్రూ హార్కర్ తెలిపారు అని రాయిటర్స్ పేర్కొంది. ఫ్యాక్టరీల వద్ద అమ్మక ధరల పెరుగుదల మార్చి తర్వాతి అత్యల్ప స్థాయికి చేరింది. నియామకాలపై బ్రేక్ పడటం, ఆర్థిక వృద్ధి మందగమనం కలిసి 2026 వైపు అడుగులు వేస్తున్న వేళ ఆర్థిక రంగం కఠిన దశలోకి ప్రవేశిస్తున్నట్టు నిపుణులు అంచనా వేస్తున్నారు.