Polavaram: పోలవరం పునరావాసం పనులు వేగవంతం.. 781 నిర్వాసిత కుటుంబాలకు ఆనందం
ఈ వార్తాకథనం ఏంటి
పోలవరం ప్రాజెక్టు పునరావాసం పనులు మరింత వేగంగా సాగుతున్నాయి. రాష్ట్ర ప్రభుత్వం తాజాగా రూ.1,100 కోట్లు పోలవరం సింగిల్‌ నోడల్‌ ఖాతా (ఎస్‌ఎన్‌ఏ)లో జమ చేసింది. ఖజానాలో సొమ్ములు సిద్ధంగా ఉన్నందున, త్వరలో చెల్లింపులు ప్రారంభించనున్నారు. పునరావాస కాలనీలలో ఇళ్ల నిర్మాణం, గిరిజనులు సాగు చేసుకునే భూమి కేటాయించేందుకు ఈ నిధులు వినియోగించబడతాయి. అలాగే, భూమి కొనుగోలు, పునరావాస కాలనీలలో గుత్తేదారులకు పెండింగ్ బిల్లుల చెల్లింపులకు కూడా వీటిని ఉపయోగిస్తారు.
వివరాలు
తొలిదశ పునరావాసానికి అడుగులు
పోలవరం ప్రాజెక్టు తొలి దశ పునరావాసం 2027 డిసెంబరు చివరికి పూర్తి చేయాలని లక్ష్యంగా పెట్టుకున్నాయి. ప్రాజెక్టులో నిర్మాణ పరంగా తొలి దశ, రెండో దశ అని లేదు.కేవలం భూసేకరణ, పునరావాసం ప్రకారం రెండు దశలుగా విభజించారు. ప్రాజెక్టులో +45.72 మీటర్ల ఎత్తులో నీరు నిల్వ చేయడానికి కావాల్సిన నిర్మాణాలు 2027 డిసెంబరు నాటికి పూర్తి చేయనున్నట్లు అధికారులు పేర్కొన్నారు. కానీ +41.15 మీటర్ల స్థాయికి మాత్రమే నీరు నిల్వ అయ్యే విధంగా పునరావాసం పనులు పూర్తి చేయబడతాయి.
వివరాలు
ఆరేళ్లుగా పునరావాసం పడక
పోలవరం ప్రాజెక్టు పనులు ప్రారంభమైన 2007లో మొదటిసారి భూసేకరణ జరిగింది. ఆ సమయంలో ఖమ్మం జిల్లాలో 7 మండలాలు,పశ్చిమ గోదావరి జిల్లాలో పోలవరం, తూర్పు గోదావరి జిల్లాలో దేవీపట్నం మండలాలను పునరావాసం కోసం గుర్తించారు. పోలవరం,దేవీపట్నం మండలాల మిగతా ప్రాంతాల్లో పెద్ద స్థాయిలో పునరావాసం పనులు నిర్వహించలేదు. 2017లో మరలా భూసేకరణ జరిగినప్పటికీ, పునరావాసం ఇంకా ప్రారంభించలేదు. జగన్‌ ప్రభుత్వంలో కేవలం గొమ్ముగూడెం గ్రామానికి తప్ప వందల ఆవాసాలకు పునరావాసం జాడే లేదు. తాజాగా కూటమి ప్రభుత్వం ఏర్పడిన తర్వాత, నిర్వాసితుల కష్టాలను తీర్చడానికి చర్యలు ప్రారంభించారు. 2024లో పునరావాస ప్యాకేజీ కింద రూ.104 కోట్లు జమ చేయడం జరిగింది. ఇప్పుడు మరోసారి రూ.1,100 కోట్లు పునరావాస కార్యక్రమాల చెల్లింపులకు సిద్ధమయ్యాయి.
వివరాలు
తొలిదశ పునరావాసం పూర్తికి ఏం చేయాలంటే..
41.15 మీటర్ల స్థాయికి నీరు నిల్వ చేయడానికి 1,00,099 ఎకరాల భూమి సేకరణ చేయాలి. ఇప్పటివరకు 91,156 ఎకరాల భూమి సేకరణ పూర్తయింది. మొత్తం 38,060 నిర్వాసిత కుటుంబాలను తరలించాలి. ప్రస్తుతం ఇంకా 23,689 కుటుంబాలను తరలించాల్సి ఉంది. ఇందులో 2026 మార్చి నాటికి 6,575 కుటుంబాలను, 2027 మార్చి నాటికి 17,114 కుటుంబాలను తరలించాలని ప్రణాళిక. మొత్తం 38,060 కుటుంబాలకు ఇప్పటివరకు 19,953 కుటుంబాలకు పునరావాస ప్యాకేజీ అందించారు. 34,360 కుటుంబాలు ప్రభుత్వం ఇల్లు కట్టి ఇవ్వాలని కోరాయి. ఇప్పటివరకు 15,439 ఇళ్ల నిర్మాణం పూర్తి అయ్యింది.