Anantapuram: అనంతపురం జిల్లాలో రథం దగ్ధం.. అధికారులకు సీఎం కీలక ఆదేశాలు..
అనంతపురం జిల్లా కనేకల్ మండలంలోని హనకనహాల్ గ్రామంలో మంగళవారం అర్ధరాత్రి శ్రీ రామాలయం రథానికి గుర్తు తెలియని దుండగులు నిప్పు పెట్టారు. ఈ ఘటన స్థానికుల దృష్టికి వచ్చిన వెంటనే మంటలను ఆర్పారు.అయితే ఆ సమయంలో రథం సగానికి పైగా కాలిపోయింది. స్థానికుల సమాచారంతో ఘటనా స్థలానికి చేరుకున్న కళ్యాణ్ దుర్గం డివిజన్ డీఎస్పీ రవిబాబు ఆధ్వర్యంలో పోలీసులు దర్యాప్తు ముమ్మరం చేశారు. కాలిపోయిన తెరును డీఎస్పీ రవిబాబు పరిశీలించారు.ఈకేసు క్రింద నిందితులను పట్టుకునేందుకు నాలుగు ప్రత్యేక బృందాలను ఏర్పాటు చేశారు. తేరు కాలిన ప్రదేశంలో నిందితులకు సంబంధించిన విలువైన సంచారాలను సేకరించినట్లు సమాచారం అందుతోంది. సంఘటనా స్థలంలో లభ్యమైన సమాచారాన్ని ఆధారంగా చేసుకుని నిందితుల కోసం ముమ్మరంగా గాలింపు చర్యలు చేపట్టారు.
నిందితులని వెంటనే గుర్తించి అరెస్ట్ చేయాలి: చంద్రబాబు
ఇదే సమయంలో,అనంతపురం జిల్లాలో రథం దగ్ధంపై ముఖ్యమంత్రి నారా చంద్రబాబు నాయుడు అధికారులతో మాట్లాడారు. అర్ధరాత్రి ఆలయ రథం దగ్ధం అయిన ఈ ఘటనను తీవ్రంగా ఖండించారు.ఘటనకు సంబంధించిన పూర్తి వివరాలు తెలుసుకున్న సీఎం,అగంతకులు నిప్పు పెట్టడంతో రథం కాలిపోయినట్లు జిల్లా అధికారులు తెలిపారు. సీఎం చంద్రబాబు ఈ ఘటనపై సమగ్ర దర్యాప్తు చేపట్టి నిందితులను వెంటనే అరెస్టు చేయాలని ఆదేశించారు. దర్యాప్తు వివరాలను ఎప్పటికప్పుడు తనకు తెలియజేయాలని కూడా కోరారు.అనంతపురంలో రథం దగ్ధం ఘటనపై అత్యవసర విచారణకు ఆదేశాలు జారీ చేసిన చంద్రబాబు,జిల్లా కలెక్టర్,ఎస్పీలను ఘటనా స్థలానికి వెళ్లాలని ఆదేశించారు. అలాగే,ఘటనకు గల కారణాలపై వీలైనంత త్వరగా నివేదిక ఇవ్వాలని స్పష్టం చేశారు.అలాగే నిందితులను వెంటనే గుర్తించి అరెస్ట్ చేయాలని సూచించారు.
