Revanth Reddy: జూబ్లీహిల్స్ ఉపఎన్నిక ప్రచారానికి సిద్ధమైన సీఎం రేవంత్.. రెండు విడతలుగా సాగనున్న ముఖ్యమంత్రి ప్రచారం
ఈ వార్తాకథనం ఏంటి
జూబ్లీహిల్స్ అసెంబ్లీ ఉప ఎన్నికల ప్రచారం వేడెక్కుతున్న నేపథ్యంలో,తెలంగాణ ముఖ్యమంత్రి రేవంత్ రెడ్డి స్వయంగా దిగనున్నారు. కాంగ్రెస్ అభ్యర్థి విజయం కోసం ఆయన విస్తృతంగా ప్రచారం చేయనున్నారు. ఈ సందర్భంగా సీఎం పర్యటనకు సంబంధించిన పూర్తి షెడ్యూల్ ఖరారైనట్లు సమాచారం. దీని ప్రకారం ఆయన ఒక భారీ ప్రజాసభలో పాల్గొనడంతో పాటు,పలు రోడ్‌షోలలో కూడా పాల్గొని ఓటర్లను ఉద్దేశించి ప్రసంగించనున్నారు. కాంగ్రెస్ వర్గాల ప్రకారం,రేపు జూబ్లీహిల్స్ నియోజకవర్గ పరిధిలో మహా బహిరంగ సభ నిర్వహించేందుకు ఏర్పాట్లు జరుగుతున్నాయి. మొదటి విడత రోడ్‌షోలు ఈ నెల 30, 31 తేదీల్లో నిర్వహించగా,రెండో విడత నవంబర్ 4, 5 తేదీల్లో జరుగుతాయని సమాచారం.
వివరాలు
మతం పేరుతో బీజేపీ ఓట్లు అడుగుతోందన్న మహేశ్‌గౌడ్
ఈ రెండు విడతల్లోనూ సీఎం రేవంత్‌రెడ్డి స్వయంగా పాల్గొని పార్టీ అభ్యర్థి గెలుపు కోసం ప్రచారం చేయనున్నారు. ఈ ప్రచార కార్యక్రమాలపై టీపీసీసీ అధ్యక్షుడు మహేశ్‌కుమార్ గౌడ్ ఢిల్లీలో మీడియాతో మాట్లాడారు. రేవంత్‌రెడ్డి ప్రచారం రెండు విడతలుగా జరుగుతుందని ఆయన వివరించారు. తమ ప్రభుత్వం ఏర్పడిన తర్వాత జూబ్లీహిల్స్ ప్రజలకు 70 శాతం సంక్షేమ పథకాలు చేరాయని పేర్కొన్నారు. అదే సమయంలో బీజేపీ మాత్రం మతపరమైన రాజకీయాలతో ఓట్లు పొందే ప్రయత్నం చేస్తోందని ఆయన విమర్శించారు. హైదరాబాద్ అభివృద్ధి కోసం బీజేపీ ప్రభుత్వం ఏ విధమైన కృషి చేయలేదని, ముఖ్యంగా కేంద్ర మంత్రి కిషన్‌ రెడ్డి నగర అభివృద్ధి పట్ల నిర్లక్ష్యంగా వ్యవహరించారని ఆరోపించారు.
వివరాలు
తాము వ్యక్తిగత విమర్శలు చేయబోమని స్పష్టీకరణ
జూబ్లీహిల్స్ ఉపఎన్నికలో కాంగ్రెస్ తప్పక గెలుస్తుందనే విశ్వాసాన్ని మహేశ్ గౌడ్ వ్యక్తం చేశారు. ఏఐసీసీ నాయకత్వం ప్రతీ ఒక్కరిని సమానంగా పరిశీలిస్తోందని,అధిష్ఠానం దృష్టిలో ఎవరూ చిన్నవారు, పెద్దవారు కాదని అన్నారు. అలాగే, బీఆర్ఎస్ నాయకులు కేసీఆర్, కేటీఆర్‌ల మాదిరిగా తాము ప్రత్యర్థుల వ్యక్తిగత జీవితాల్లోకి జోక్యం చేసుకోబోమని స్పష్టం చేశారు. మాగంటి గోపీనాథ్ కుటుంబ వ్యవహారాలు వారి వ్యక్తిగతమైనవని, వాటికి కాంగ్రెస్ పార్టీకి ఎలాంటి సంబంధం లేదని ఆయన తేల్చి చెప్పారు.