Prabha Arun Kumar:ఆస్ట్రేలియాలో బెంగళూరు టెక్కీ హత్య.. సమాచారం ఇచ్చిన వారికి $1 మిలియన్ రివార్డు!
2015 మార్చి 7న ఆస్ట్రేలియాలోని సిడ్నీలో సాఫ్ట్‌వేర్ ఇంజినీరుగా పనిచేస్తున్న ప్రభా అరుణ్‌కుమార్‌ (41) దారుణ హత్యకు గురయ్యారు. బెంగళూరుకు చెందిన ఆమెను గుర్తుతెలియని దుండగులు కత్తితో గొంతులో పొడిచి హతమార్చారు. హత్య జరిగి దాదాపు పదేళ్లు గడిచినా, ఆ హంతకుడి వివరాలు, ఆచూకీని సిడ్నీ పోలీసులు ఇప్పటికీ కనుగొనలేకపోయారు. ఈ కేసులో సహకరించి సమాచారాన్ని అందించే వారికి మిలియన్ డాలర్ల బహుమతిని ప్రకటించినట్లు న్యూసౌత్ వేల్స్ ప్రభుత్వం వెల్లడించింది. మన దేశ కరెన్సీ ప్రకారం ఈ బహుమతి సుమారు రూ.5.57 కోట్లు.
ఇంటికి 300 మీటర్ల దూరంలోనే ఆమె దారుణ హత్య
బెంగళూరులోని మైండ్‌ ట్రీ కంపెనీలో పని చేస్తున్న ప్రభా విధి నిర్వహణలో భాగంగా సిడ్నీకి వెళ్లారు. విధులు పూర్తి చేసుకుని బెంగళూరులో ఉన్న భర్తతో ఫోన్‌లో మాట్లాడుతుండగా, తనను ఎవరో వెంబడిస్తున్నారనిపిస్తోందని చెప్పి, కొంత సేపటికి తిరిగి ఫోన్ చేస్తానని ఆమె అన్నారు. కానీ, ఇంటికి 300 మీటర్ల దూరంలోనే ఆమెను దారుణంగా హత్య చేశారు. ఆమెను ఎవరు వెంబడించారని, ఎందుకు హత్య చేసారనే విషయాన్ని ఇప్పటి వరకు పోలీసులు సస్పష్టంగా కనుగొనలేకపోయారు. ఇప్పుడు, ఆ హంతకుల వెతకడానికి ఆస్ట్రేలియా, భారత్‌లో వేట ప్రారంభమైంది.
