'రాష్ట్రాన్ని దోచుకొని, ప్రజలను పేదరికంలోకి నెట్టారు'; త్రిపురలో కాంగ్రెస్-లెఫ్ట్ కూటమిపై మోదీ ధ్వజం
త్రిపుర ఎన్నికల ప్రచారంలో భాగంగా శనివారం ప్రధాని మోదీ కాంగ్రెస్-లెఫ్ట్ కూటమిపై విమర్శనాస్త్రాలు సంధించారు. రెండు పార్టీలు రాష్ట్రాన్ని ఏళ్ల తరబడి దోచుకొని, ప్రజలను పేదరికంలోకి నెట్టినట్లు ఆరోపించారు. త్రిపురలోని పేదలు, గిరిజన సంఘాలు, మహిళలు, యువత కలలు వామపక్ష, కాంగ్రెస్ పాలనలో చెదిరిపోయాయన్నారు. కాంగ్రెస్-సీపీఎం హయాంలో వేలాది గ్రామాలు అభివృద్ధికి దూరమయ్యాయని మోదీ దుయ్యబట్టారు. గత ఐదేళ్లలో బీజేపీ ప్రభుత్వం దాదాపు 5వేల గ్రామాలను రోడ్లతో అనుసంధానం చేసిందని ప్రధాని మోదీ ప్రకటించారు. త్రిపుర ప్రజల సరైన ఎంపిక రాష్ట్రాన్ని అభివృద్ధి పథంవైపు నడిపిస్తుందని స్పష్టం చేశారు.
త్రిపుర వాణిజ్యానికి దక్షిణాసియాకు గేట్‌వే అవుతుంది: మోదీ
డబుల్ ఇంజిన్ సర్కారులో రాష్ట్రం వేగంగా అభివృద్ధి చెందినట్లు ప్రధాని మోదీ పేర్కొన్నారు. కాంగ్రెస్, వామపక్షాలు అభివృద్ధిలో రాష్ట్రాన్ని వెనక్కి నెట్టినట్లు చెప్పారు. భాజపా ప్రభుత్వం త్రిపురను చందా సంస్కృతిని నుంచి విముక్తి చేసినట్లు పేర్కొన్నారు. సీపీఎం కార్యకర్తలు పోలీసు స్టేషన్‌లను నియంత్రించేవారని, ఇప్పుడు బీజేపీ చట్టబద్ధమైన పాలనను సాగిస్తున్నట్లు అన్నారు. రాష్ట్రంలో ఇప్పుడు అన్ని గ్రామాలను కలుపుతూ 5,000 కి.మీ రోడ్లు ఉన్నాయన్నారు. ప్రతి గ్రామం ఆనందించేలా మౌలిక సదుపాయాలను అభివృద్ధి చేస్తున్నామని ప్రధాని మోదీ అన్నారు. గత సంవత్సరం త్రిపుర విమానాశ్రయం ప్రారంభించడంతో, ఈ ప్రాంతానికి రవాణా మరింత సులభతరం కానున్నట్లు చెప్పారు. త్రిపుర త్వరలో వాణిజ్యానికి దక్షిణాసియాకు గేట్‌వే అవుతుందన్నారు.
ఈ టైమ్ లైన్ ని షేర్ చేయండి