Srisailam Dam: శ్రీశైలం డ్యామ్‌ వద్ద భద్రతా లోపాలు.. ప్లంజ్‌ పూల్‌ వద్ద ప్రమాద హెచ్చరికలు!
ఈ వార్తాకథనం ఏంటి
శ్రీశైలం జలాశయ స్పిల్‌వే దిగువ భాగంలో ఏర్పడిన ప్లంజ్‌ పూల్‌ (పెద్ద లోతైన గొయ్యి) మరింత విస్తరిస్తుండటంతో జలాశయ భద్రతపై ఆందోళనలు పెరుగుతున్నాయి.
ఈ ప్లంజ్‌ పూల్‌ ప్రాజెక్టు పునాది కన్నా లోతుకు చేరినట్టు నిపుణులు గుర్తించారు. ప్రత్యేకించి ఏప్రాన్‌ స్థాయి కన్నా దిగువన ఈ గొయ్యి కొనసాగుతూ ఉండటం ప్రమాద సంకేతంగా చెబుతున్నారు.
ప్లంజ్‌ పూల్‌ విస్తరణను అడ్డుకోవడానికి గతంలో ఏర్పాటు చేసిన స్టీల్‌ సిలిండర్లు పూర్తిగా ధ్వంసమయ్యాయి.
ఈ పరిణామాల నేపథ్యంలో జాతీయ డ్యాం భద్రతా అథారిటీ (NDSA) ఛైర్మన్‌ అనిల్‌ జైన్‌ నేతృత్వంలోని బృందం ఇటీవల ప్రాజెక్టును పరిశీలించింది.
Details
తక్షణమే చర్యలు తీసుకోవాలని సిఫార్సులు
తక్షణ చర్యలు తీసుకోవాల్సిన అవసరాన్ని తెలియజేస్తూ పలు సిఫారసులు చేసింది.
అయితే గతంలో 2022, 2024 సంవత్సరాల్లో చేసిన సూచనలను ఇప్పటికీ అమలు చేయకపోవడంపై వారు అసంతృప్తిని వ్యక్తం చేశారు.
భద్రతా పనుల్లో ఆలస్యం జగన్‌ ప్రభుత్వం కాలంలో మొదలై ఇప్పటికీ కొనసాగుతుండటం గమనార్హం.
ఈ నేపథ్యంలో తెలంగాణ ప్రభుత్వం ప్రాజెక్టు పరిస్థితిపై అథారిటీకి ఫిర్యాదు చేయగా, ఆంధ్రప్రదేశ్‌ రాష్ట్రం కూడా అథారిటీ ఛైర్మన్‌ను ప్రాజెక్టు సందర్శించాలని కోరింది.
త్వరలో ముఖ్యమంత్రి చంద్రబాబు జలవనరుల శాఖతో సమావేశం జరపనుండగా, శ్రీశైలంలోని పరిస్థితి ప్రధానాంశంగా చర్చించనున్నారు.
Details
ప్లంజ్‌ పూల్‌ లోతు ప్రమాద సంకేతమా?
శ్రీశైలం ఏప్రాన్‌ స్థాయి 169 మీటర్ల వద్ద ఉండగా, ప్లంజ్‌ పూల్‌ లోతు 122 మీటర్ల వరకు నమోదు అయ్యింది.
ఇది ప్రాజెక్టు ఫౌండేషన్‌లో అత్యంత లోతైన స్థాయి అయిన 134 మీటర్ల కన్నా 12 మీటర్ల దిగువకు చేరింది.
ఇది ఇప్పుడు విస్తరిస్తూ ఉండటంతో, భవిష్యత్‌లో ప్రమాదం తలెత్తకుండా చర్యలు తీసుకోవాలని నిపుణులు సూచిస్తున్నారు. నీటి తీవ్ర ప్రవాహం వల్లనే ఈ కోత పెరుగుతోందని చెబుతున్నారు.
1984 నుంచే ప్లంజ్‌ పూల్‌ సమస్యను గుర్తించిన అధికారులు, 1985-87మధ్య కాలంలో ప్లంజ్‌ పూల్‌ విస్తరణను అడ్డుకోవడానికి 62 స్టీల్‌ సిలిండర్లను కాంక్రీటుతో నింపి ఏర్పాటు చేశారు.
ఇప్పటివరకు అందులో 12 పూర్తిగా, 8 పాక్షికంగా ధ్వంసమయ్యాయి. అయితే ఇప్పటివరకు వీటి పునర్నిర్మాణం చేపట్టలేదు.
Details
ఇంకా చాలా పనులు పెండింగ్‌
ప్రాజెక్టు స్పిల్‌వే దిగువన ఎడమ, కుడి కొండ గట్ల వాలును తగ్గించేందుకు 'క్రీటింగ్‌' చేయాల్సిన అవసరం ఉంది. ఏప్రాన్‌ పైభాగానికి రహదారి నిర్మాణం కూడా ఆవశ్యకంగా ఉందని నిపుణులు సూచించారు.
అయితే ఫండింగ్‌ కొరత వల్ల అన్ని పనులు ఆలస్యమవుతున్నాయి. డ్రిప్‌ పథకం కింద రూ.200 కోట్లతో తొలి విడత పనులు చేపట్టాలన్న ప్రతిపాదన ముందుకెళ్లలేదు.
2024లో రూ.14.7 కోట్ల మంజూరు ప్రకటన చేసినా ఇప్పటివరకు కేవలం రూ.2 కోట్లే విడుదలయ్యాయి.
ప్రస్తుతం కొంతమేర పనులు కొనసాగుతున్నా, కీలక పనుల కోసం తగిన నిధులు విడుదల చేయాల్సిన అవసరం ఉందని అధికారులు స్పష్టం చేస్తున్నారు.