తిరుమలో భద్రతా లోపం: 'ఆనంద నిలయం' దృశ్యాలను ఫోన్‌లో చిత్రీకరించిన భక్తుడు
తిరుమల వెంకటేశ్వర స్వామి ఆలయంలో మరోసారి భద్రతా లోపం కనిపించింది. ఆలయంలోకి గుర్తుతెలియని భక్తుడు మొబైల్ ఫోన్‌తో చొరబడి 'ఆనంద నిలయం'తో పాటు ఇతర ఆవరణల దృశ్యాలను తన ఫోన్‌లో ఫోన్ రికార్డు చేశాడు. ఈ ఘటన తిరుమల తిరుపతి దేవస్థానం(టీటీడీ) దృష్టికి రావడంతో విచారణకు ఆదేశించింది. మొబైల్ ఫోన్లు, ఇతర ఎలక్ట్రానిక్ గాడ్జెట్‌లు నిషేధించబడిన శ్రీవారి ఆలయంలో భద్రతా లోపాలను ఈ సంఘటన బహిర్గతం చేసింది. టీటీడీ విజిలెన్స్ అండ్ సెక్యూరిటీ వింగ్‌ చేపట్టిన పలు స్థాయి తనిఖీలను దాటి ఆ భక్తుడు ఫోన్‌ను ఎలా లోపలికి తీసుకురాగలిగాడని అధికారులకు ఆశ్చర్యకరంగా మారింది. టీటీడీ ఏర్పాటు చేసిన సిసిటివి నిఘా బృందాలు కూడా భక్తుడు వీడియోను రికార్డ్ చేస్తున్నప్పుడు ట్రాక్ చేయలేకపోయాయి.
ఆనంద నిలయం వీడియో సోషల్ మీడియాలో వైరల్
అయితే ఆనంద నిలయానికి సబంధించిన ఒక నిమిషం నిడివిగల వీడియో పలు సోషల్ మీడియా ప్లాట్‌ఫామ్‌లలో అప్‌లోడ్ చేయబడింది. ఇది విపరీతంగా వైరల్ కావడంతో టీటీడీ అధికారులు ఆందోళన వ్యక్తం చేస్తున్నారు. ఈ వీడియో ఆదివారం రాత్రి రికార్డయినట్లు టీటీడీ విజిలెన్స్ అండ్ సెక్యూరిటీ విభాగం గుర్తించింది. ఒక నిమిషం నిడివిగల ఈ వీడియోలో 'ఆనంద నిలయం', తిరుమల ఆలయం లోపలి ఆవరణలు చాలా దగ్గర నుంచి కనిపిస్తాయి. వీడియో సోషల్ మీడియాలో సోమవారం వైరల్ అయిన తర్వాత మాత్రమే సంఘటన వెలుగులోకి వచ్చింది. నిందితుడి ఆచూకీ కోసం విచారణకు ఆదేశించినట్లు టీటీడీ విజిలెన్స్ అండ్ సెక్యూరిటీ కార్యాలయం బాలిరెడ్డి తెలిపారు.
