Calcutta: హైకోర్టు సంచలన తీర్పు..పరస్పర అంగీకారంతో శారీరక సంబంధం చట్టబద్ధమే
ఈ వార్తాకథనం ఏంటి
ఇద్దరు వివాహితులు పరస్పర అంగీకారంతో శారీరక సంబంధం పెట్టుకోవడం నేరం కాదంటూ కలకత్తా హైకోర్టు తాజా తీర్పులో కీలక వ్యాఖ్యలు చేసింది. శారీరక సంబంధానికి ఇరువురు వ్యక్తులు స్పష్టమైన అంగీకారం తెలిపినప్పుడు, అది నేరంగా పరిగణించదలచే అవకాశమేదీ లేదని న్యాయమూర్తి స్పష్టం చేశారు. వైవాహిక పరిస్థితి తెలిసిన తర్వాత కూడా పరస్పర సమ్మతితో సంబంధం కొనసాగితే, దాన్ని ఏకాభిప్రాయ సంబంధంగా చూడాలని పేర్కొన్నారు. ఈ కేసులో ఇద్దరు వివాహితులు రెండు సంవత్సరాలుగా శారీరక సంబంధం కలిగి ఉన్నారు. ఈ విషయం బయటపడ్డ తర్వాత, సంబంధిత మహిళ భర్త ఆమెతో కలిసి జీవించేందుకు నిరాకరించాడు. దీంతో ఆ మహిళ, తాను సంబంధం పెట్టుకున్న వ్యక్తిని వివాహం చేసుకోవాలని కోరింది.
Details
పెద్ద చర్చకు దారితీసిన తీర్పు
అయితే అతడు ఆమె అభ్యర్థనను తిరస్కరించాడు. ఈ పరిణామాల నేపథ్యంలో ఆ మహిళ 2024 సెప్టెంబర్ 8న మేనాగురి పోలీస్ స్టేషన్‌లో ఫిర్యాదు చేసింది. దీంతో పోలీసులు బీఎన్ఎస్ సెక్షన్ 69 (మోసపూరితంగా శారీరక సంబంధానికి ప్రేరేపించడం) మరియు 351(2) (క్రిమినల్ బెదిరింపు) కింద కేసును నమోదు చేశారు. కోర్టులో విచారణ జరుగుతూ ఉండగా, న్యాయమూర్తి వివరణ ఇచ్చారు. ఇరువురి మధ్య పరస్పర అంగీకారం ఉన్న నేపథ్యంలో, ఈ కేసులో మోసపూరిత లైంగిక సంబంధం లేదా బెదిరింపు ఎటువంటి ఆధారాలపై ఆధారపడదని తెలిపారు. దీంతో సంబంధిత వ్యక్తిపై నమోదైన కేసును హైకోర్టు రద్దు చేస్తూ తీర్పు వెలువరించింది. ఈ తీర్పు సామాజికంగా పెద్ద చర్చకు దారి తీసే అవకాశం ఉంది.