Shia Muslims protest: ఖమేనీ మృతి.. లక్నో నుంచి హైదరాబాద్ వరకు షియా ముస్లింల నిరసనలు
ఈ వార్తాకథనం ఏంటి
ఇరాన్ సుప్రీం లీడర్ ఆయతుల్లా అలీ ఖమేనీ అమెరికా-ఇజ్రాయెల్ సంయుక్త సైనిక దాడిలో మృతి చెందడంతో భారత దేశవ్యాప్తంగా షియా ముస్లింలు తీవ్ర ఆగ్రహం వ్యక్తం చేస్తున్నారు. ఆదివారం లక్నో, హైదరాబాద్, శ్రీనగర్, భోపాల్ సహా పలు నగరాల్లో వేలాది మంది రోడ్లపైకి వచ్చి నిరసనలు చేపట్టారు. టేహ్రాన్లో జరిగిన ఈ దాడిలో ఖామెనీతో పాటు ఆయన కుమార్తె, అల్లుడు, మనవరాలు కూడా మృతి చెందినట్లు ఇరాన్ ప్రభుత్వ మీడియా వెల్లడించింది. జమ్ముకశ్మీర్లోని శ్రీనగర్ లాల్ చౌక్ వద్ద భారీగా గుమిగూడిన నిరసనకారులు ఎరుపు, నలుపు, పసుపు జెండాలతో ఆందోళన చేపట్టారు. ఖమేనీ చిత్రాలతో, ఇరాన్ జెండాలతో కొందరు క్లాక్ టవర్ ఎక్కి నివాళులు అర్పించగా, మరికొందరు కన్నీళ్లు పెట్టుకున్నారు.
వివరాలు
ఉత్తరప్రదేశ్ లో మూడు రోజుల సంతాపదినాలు
బడ్గామ్, బండిపోరా, అనంతనాగ్, పుల్వామా జిల్లాల్లోనూ నిరసనలు కొనసాగాయి. పరిస్థితిని దృష్టిలో పెట్టుకుని అధికారులు లాల్ చౌక్ను మూసివేశారు. సీఎం ఒమర్ అబ్దుల్లా ప్రజలు శాంతంగా ఉండాలని, ఉద్రిక్తతలకు దారి తీసే చర్యలకు దూరంగా ఉండాలని విజ్ఞప్తి చేశారు. లడాఖ్లోని లేహ్, కార్గిల్ పట్టణాల్లోనూ నల్ల దుస్తుల్లో శోకయాత్రలు నిర్వహించారు. కార్గిల్లో ఏడు రోజుల పాటు సంతాపదినాలు పాటిస్తున్నట్లు మత సంస్థలు ప్రకటించాయి. ఉత్తరప్రదేశ్లో లక్నోలో రూమీ గేట్, బారా ఇమాంబారా,చిన్న ఇమాంబారా వద్ద పెద్ద సంఖ్యలో ప్రజలు గుమికూడారు. ఖమేనీ మృతి మానవత్వానికి పెద్ద నష్టమని నిరసనకారులు ఆరోపిస్తూ అమెరికా, ఇజ్రాయెల్ చర్యలను ఖండించారు. మౌలానా కల్బే జవాద్ మూడు రోజుల సంతాపదినాలు పాటించాలని, ఇళ్లపై నల్ల జెండాలు ఎగరవేయాలని పిలుపునిచ్చారు.
వివరాలు
కర్ణాటకలో మూడు రోజుల సంతాపదినాలు
జౌన్పూర్, ముజఫర్నగర్, అలీగఢ్లోనూ, ముఖ్యంగా అలీగఢ్ ముస్లిం యూనివర్సిటీ విద్యార్థులు పాల్గొన్న నిరసనలు శాంతియుతంగా సాగినట్లు పోలీసులు తెలిపారు. మధ్యప్రదేశ్ రాజధాని భోపాల్లో కరోండ్ ప్రాంతంలోని అలే మహమ్మద్ షియా జామా మస్జిద్ వద్ద జోహర్ నమాజ్ తర్వాత సంతాప సభ నిర్వహించారు. ఖమేనీ సేవలు ఎప్పటికీ గుర్తుండిపోతాయని ఇమామ్ బంకర్ హుస్సేన్ పేర్కొన్నారు. హైదరాబాద్ పూరాని హవేలీలో తంజీమ్-ఎ-జాఫరీ ఆధ్వర్యంలో నిర్వహించిన ర్యాలీలో మహిళలు, పిల్లలు సహా పెద్ద సంఖ్యలో ప్రజలు పాల్గొని అమెరికా, ఇజ్రాయెల్ వ్యతిరేక నినాదాలు చేశారు. కర్ణాటకలోని అలిపుర గ్రామంలో కూడా మూడు రోజుల సంతాపదినాలు ప్రకటించి స్వచ్ఛందంగా దుకాణాలు మూసివేశారు. గ్రామంలో శాంతి భద్రతల కోసం అన్ని వేడుకలు, ప్రజా కార్యక్రమాలు తాత్కాలికంగా నిలిపివేశారు.