SIM Binding: వాట్సాప్-టెలిగ్రామ్‌కు సిమ్ బైండింగ్ తప్పనిసరి.. కేంద్రం నూతన కొత్త ఆదేశాలు
ఈ వార్తాకథనం ఏంటి
కమ్యూనికేషన్‌ యాప్‌లపై కేంద్ర ప్రభుత్వం కీలక నిర్ణయం తీసుకుంది. దేశంలో పనిచేస్తున్న వాట్సాప్, టెలిగ్రామ్, సిగ్నల్, స్నాప్‌చాట్, షేర్‌చాట్, జియోచాట్, అరట్టై, జోష్ తదితర ప్రముఖ యాప్‌లకు సిమ్ బైండింగ్ విధానం తప్పనిసరి చేసింది. యాక్టివ్‌ సిమ్ కార్డు లేకుండా ఇకపై ఈ యాప్‌లు పనిచేయకుండా డిపార్ట్‌మెంట్‌ ఆఫ్‌ టెలికమ్యూనికేషన్స్‌ (DoT) ఆదేశాలు జారీ చేసింది. 'టెలికమ్యూనికేషన్ సైబర్‌ సెక్యూరిటీ సవరణ నియమాలు-2025' ప్రకారం ఈ నిబంధన అమల్లోకి తీసుకురానుంది. ఇదే మొదటిసారిగా భారత్‌లో యాప్ ఆధారిత కమ్యూనికేషన్‌ సేవలు టెలికాం సేవల మాదిరిగా కఠిన నిబంధనలకు లోబడుతున్నాయి. కొత్త సిమ్ బైండింగ్ విధానం బ్యాంకింగ్ మరియు యూపీఐ సర్వీసులకు ఉన్న భద్రతా విధానాన్ని ప్రతిబింబిస్తోంది.
Details
సిమ్, ఫోన్ మార్చినా యాప్ ఆటోమేటిక్ గా లాగౌట్ అవుతుంది
యూజర్ సిమ్ యాక్టివ్‌గా లేకుంటే యాప్‌లో లాగిన్‌ కానే అవకాశం ఉండదు. ప్రభుత్వం ఇవన్నీ టెలికమ్యూనికేషన్ ఐడెంటిఫైయర్ యూజర్ ఎంటిటీలుగా వర్గీకరించింది. యూజర్ ఏ మొబైల్ నంబర్, ఏ సిమ్‌తో యాప్‌లో అకౌంట్ రిజిస్టర్‌ చేస్తే, ఆ సిమ్ కార్డు ఫోన్‌లో ఉంటేనే యాప్ పనిచేస్తుంది. సిమ్‌ను తీసేస్తే లేదా ఫోన్ మార్చితే యాప్ ఆటోమేటిక్‌గా లాగౌట్ అవుతుంది. వెబ్‌ బ్రౌజర్‌ ద్వారా యాప్‌లను ఉపయోగించే వినియోగదారుల కోసం కూడా మార్పులు తప్పనిసరి చేశారు. వెబ్‌ లాగిన్లు ప్రతి ఆరు గంటలకు ఆటోమేటిక్‌గా లాగౌట్ అవుతాయి. సేవలను కొనసాగించాలంటే యూజర్లు మళ్లీ క్యూఆర్‌ కోడ్‌ స్కాన్‌ చేసి లాగిన్‌ కావాలి. సిమ్ బైండింగ్ అమలుపరిచే ప్రధాన లక్ష్యం సైబర్‌ మోసాలను అరికట్టడం.
Details
90 రోజుల్లో అమల్లోకి
ప్రస్తుతం చాలా మెసేజింగ్ యాప్‌లు ఒకసారి మొబైల్ నంబర్ ధృవీకరణ పూర్తయిన తర్వాత, సిమ్ తొలగించినా, డీయాక్టివేట్ చేసినా కూడా యాప్ పనిచేస్తూనే ఉంటుంది. దీంతో సైబర్‌ నేరగాళ్లకు ఈ ప్లాట్‌ఫారమ్‌లను వినియోగించుకోవడం సులభమవుతుందని సెల్యులార్‌ ఆపరేటర్స్‌ అసోసియేషన్‌ ఆఫ్‌ ఇండియా పేర్కొంటోంది. సైబర్‌ నిపుణుల ప్రకారం,కొత్త నియమాలతో యూజర్ల సున్నితమైన సమాచారాన్ని చట్టవిరుద్ధంగా ట్రాక్ చేయడం గణనీయంగా తగ్గుతుంది. ఇదివరకున్న ఖాళీలు తగ్గి, కమ్యూనికేషన్‌ యాప్‌ల సైబర్‌ భద్రత మరింత బలోపేతం అవుతుందని అభిప్రాయపడుతున్నారు. ప్రస్తుతం యూపీఐ చెల్లింపు యాప్‌లు యాక్టివ్‌ సిమ్ కార్డు ఉన్న పరికరాల్లోనే సేవలు అందిస్తున్నాయి. అదే విధానాన్ని ఇప్పుడు అన్ని కమ్యూనికేషన్‌ యాప్‌లకు వర్తింపజేస్తోంది కేంద్ర ప్రభుత్వం. ఈ నియమాలు 90 రోజుల్లో అమల్లోకి రానున్నాయి.