KTR: ఫోన్ ట్యాపింగ్ కేసులో కేటీఆర్ కు సిట్ నోటీసులు
ఈ వార్తాకథనం ఏంటి
ఫోన్ ట్యాపింగ్ కేసు విచారణలో మరో కీలక పరిణామం చోటుచేసుకుంది. ఈ కేసులో బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్కు ప్రత్యేక దర్యాప్తు బృందం (సిట్) నోటీసులు జారీ చేసింది. జనవరి 23, శుక్రవారం ఉదయం 11 గంటలకు జూబ్లీహిల్స్ పోలీస్ స్టేషన్కు హాజరై విచారణకు సహకరించాలని ఆ నోటీసుల్లో స్పష్టం చేసింది. గత బీఆర్ఎస్ ప్రభుత్వ పాలన సమయంలో అక్రమంగా ఫోన్ ట్యాపింగ్ జరిగిందన్న ఆరోపణలపై సిట్ అధికారులు 2024 మార్చి నెల నుంచి దర్యాప్తు కొనసాగిస్తున్న విషయం తెలిసిందే. ఇప్పటికే ఈ వ్యవహారంలో పలువురిపై ప్రధాన అభియోగపత్రం దాఖలు చేసిన దర్యాప్తు సంస్థ, కేసును మరింత లోతుగా పరిశీలిస్తోంది.
వివరాలు
అక్రమ కేసులు సమైక్య రాష్ట్రంలో కూడా తమపై పెట్టారు: హరీశ్ రావు
ఈ దర్యాప్తులో భాగంగా ఈ నెల 20న మాజీ మంత్రి హరీశ్ రావును సిట్ అధికారులు సుమారు ఏడు గంటల పాటు ప్రశ్నించారు. విచారణ అనంతరం హరీశ్ రావు స్పందిస్తూ, ఉద్యమాలు తమకు కొత్తకాదని, తాము ఎక్కడికీ పారిపోనని వ్యాఖ్యానించారు. ఇలాంటి అక్రమ కేసులు సమైక్య రాష్ట్రంలో కూడా తమపై పెట్టారని చెబుతూ ప్రభుత్వాన్ని ఆయన తీవ్రంగా విమర్శించారు. హరీశ్ రావు విచారణ ముగిసిన రెండు రోజులకే కేటీఆర్కు నోటీసులు జారీ కావడం రాజకీయ వర్గాల్లో ఆసక్తికర చర్చకు దారి తీసింది. ఈ పరిణామం ఫోన్ ట్యాపింగ్ కేసు రాజకీయంగా మరింత ప్రాధాన్యం సంతరించుకుంటుందనే అభిప్రాయాలు వ్యక్తమవుతున్నాయి.