రష్యాలో ఏయిర్ఇండియా ఫ్లైట్ ఎమర్జెన్సీ ల్యాండింగ్..సహాయం కోసం ముంబయి నుంచి మరో ఫ్లైట్
ఈ వార్తాకథనం ఏంటి
అమెరికాలోని శాన్ ఫ్రాన్సిస్కోకి భారత రాజధాని న్యూదిల్లీ నుంచి ఓ విమానం బయల్దేరింది. అది కాస్తా సాంకేతిక లోపంతో మంగళవారం అర్థాంతరంగా రష్యాలోని మగడాన్ ఏయిర్ పోర్టులో ఎమర్జెన్సీ ల్యాండింగ్ అయ్యింది.
ఇందులో ఉన్న దాదాపు 216 మంది ప్రయాణికులు, 16 మంది సిబ్బంది ఇబ్బందులు పడుతున్నారు. అయితే వీరంతా సహాయక విమానం కోసం పడిగాపులు కాస్తున్నారు.
ఈ ప్రయాణికుల సహాయార్థం వెళ్లాల్సిన విమానం, బయల్దేరడంలో తీవ్ర జాప్యం నేపథ్యంలో కేంద్ర విమానయాన మంత్రిత్వశాఖ ప్రకటన వారికి ఊరటనిస్తోంది.
ఈ విమానంలోని ప్రయాణికులను శాన్ ఫ్రాన్సిస్కో తరలించేందుకు, సహాయక విమానం బుధవారం మధ్యాహ్నం ఒంటి గంటకు ముంబయి నుంచి బయల్దేరుతుందని భారత పౌర విమానయాన మంత్రిత్వ శాఖ వెల్లడించింది.
Special Flight Arranged For Air India Passengers
ముంబయి నుంచి శాన్ ఫ్రాన్సిస్కోకు స్పెషల్ ఫ్లైట్
మగడాన్ ఏయిర్ పోర్ట్ రష్యా రాజధాని నగరం మాస్కో నుంచి సుమారు 10 వేల కిలోమీటర్ల దూరంలో ఉంది. ఇక్కడ హోటల్ సదుపాయాలు సైతం సరిగ్గా లేకపోవడంతో ప్యాసింజర్లను డార్మిటరీల్లో ఉంచారు.
ఈ సమస్య పరిష్కారం కోసం ఎయిర్ ఇండియాతో నిరంతరం సంప్రదింపులు జరుపుతున్నట్లు సదరు మంత్రిత్వశాఖ తెలిపింది.
ఎయిర్ ఇండియా B777-200LR VT-ALF విమానాన్ని మగడాన్ విమానాశ్రయానికి పంపిస్తున్నామన్న విమానయాన శాఖ, స్వయంగా ఆ శాఖ మంత్రి జ్యోతిరాదిత్య సింథియా ఈ పరిస్థితిని పర్యవేక్షిస్తున్నారని స్పష్టం చేసింది.
మగడాన్‌లో చిక్కుకున్న ప్రయాణికులను, సామాగ్రిని ఈ విమానంలో అమెరికాలోని శాన్ ఫ్రాన్సిస్కోకు తీసుకెళ్లనున్నారని పేర్కొంది. ప్రయాణికులకు సదుపాయాలు కల్పిస్తున్నట్లు, స్థానిక ప్రభుత్వం కూడా సహకరిస్తోందని ఎయిరిండియా చెప్పిందని కేంద్ర విమానయాన శాఖ వివరించింది.