AP Police: ఏపీ పోలీసులకు గుడ్ న్యూస్.. పుట్టినరోజు,పెళ్లిరోజున ప్రత్యేక సెలవు
ఈ వార్తాకథనం ఏంటి
విధి నిర్వహణలో ఎప్పుడూ నిమగ్నమై ఉండే ఆంధ్రప్రదేశ్ పోలీసు సిబ్బందికి రాష్ట్ర ప్రభుత్వం ఊరటనిచ్చే నిర్ణయం తీసుకుంది. పండగలు, పబ్బాలకు దూరంగా, కుటుంబ వేడుకలకు హాజరుకాలేక తీవ్రమైన ఒత్తిడితో పనిచేసే సిబ్బందికి ఊరటనిచ్చేలా కీలక నిర్ణయం తీసుకుంది. పోలీసులు తమ వ్యక్తిగత జీవితానికి కూడా సమయం కేటాయించుకునేలా, వారి పుట్టినరోజు, వివాహ వార్షికోత్సవం రోజున ప్రత్యేక సెలవు మంజూరు చేయాలని పోలీసు ప్రధాన అధికారి కార్యాలయం ఉత్తర్వులు జారీ చేసింది. ఈ సౌకర్యం కానిస్టేబుల్ స్థాయి నుంచి ఉన్నతాధికారుల వరకు అన్ని స్థాయిల సిబ్బందికి వర్తిస్తుందని స్పష్టం చేశారు.
వివరాలు
సెలవు మంజూరు తప్పనిసరి
రాష్ట్ర పోలీసు ప్రధాన అధికారి హరీష్ కుమార్ గుప్తా జిల్లాల పోలీసు అధికారులకు, విభాగాల అధిపతులకు ఈ మేరకు ఆదేశాలు పంపారు. అత్యవసర పరిస్థితులు మినహా,సిబ్బంది కోరిన వెంటనే ఈ ప్రత్యేక సెలవును ఇవ్వాలని స్పష్టంగా సూచించారు. ఈ ప్రక్రియలో ఎలాంటి ఆలస్యం ఉండకూడదని, సెలవు మంజూరు తప్పనిసరి అని ఆదేశాల్లో పేర్కొన్నారు. శాంతిభద్రతల పరిరక్షణలో భాగంగా పోలీసులు కుటుంబ సభ్యులతో గడిపే సమయం చాలా పరిమితంగా ఉంటుంది. ఈ నేపథ్యంలో వారి జీవితంలో ముఖ్యమైన పుట్టినరోజు, వివాహ వార్షికోత్సవం రోజుల్లో కుటుంబంతో ఆనందంగా గడిపేందుకు ఈ నిర్ణయం దోహదపడుతుందని ప్రభుత్వం భావిస్తోంది. ఈ ప్రత్యేక సెలవులు సిబ్బందికి మానసిక ఉల్లాసం కలిగించి, విధుల్లో మరింత ఉత్సాహంతో పనిచేయడానికి సహాయపడతాయని ఉన్నతాధికారులు అభిప్రాయపడుతున్నారు.
వివరాలు
పెన్షన్ దరఖాస్తులపై కొత్త నిబంధనలు:
ఈ నిర్ణయంపై పోలీసు సిబ్బంది, వారి కుటుంబ సభ్యులు సంతోషం వ్యక్తం చేస్తున్నారు. ఇక పదవీ విరమణ చేసిన ప్రభుత్వ ఉద్యోగుల పెన్షన్ ప్రతిపాదనల విషయంలో కూడా ప్రభుత్వం మార్పులు చేసింది. ఇప్పటి వరకు అమలులో ఉన్న చేతివిధానంలో దరఖాస్తులు సమర్పించేందుకు ఈ నెల 30వ తేదీ వరకు మాత్రమే అవకాశం కల్పించారు. మే 1వ తేదీ నుంచి పదవీ విరమణ చేసిన ఉద్యోగులు తప్పనిసరిగా 'నిధి' వేదిక ద్వారా ఆన్లైన్లోనే తమ దరఖాస్తులను సమర్పించాల్సి ఉంటుందని ఆర్థిక శాఖ ప్రధాన కార్యదర్శి పీయూశ్ కుమార్ ఉత్తర్వుల్లో పేర్కొన్నారు.