Supreme court: కుల వివక్ష నిర్మూలనపై యూజీసీకి సుప్రీంకోర్టు ఆదేశాలు
ఈ వార్తాకథనం ఏంటి
కాలేజీలు, ఉన్నత విద్యాసంస్థల్లో కుల వివక్ష సున్నితమైన, కానీ అత్యంత కీలకమైన అంశమని సుప్రీంకోర్టు స్పష్టం చేసింది.
విద్యా సంస్థల్లో సమానత్వం పెంపొందించడానికి సమర్థవంతమైన చర్యలు తీసుకోవాల్సిన అవసరాన్ని ధర్మాసనం ప్రధానంగా పేర్కొంది.
జస్టిస్ సూర్యకాంత్, జస్టిస్ ఉజ్జల్ భుయాన్‌ల నేతృత్వంలోని ధర్మాసనం యూనివర్సిటీ గ్రాంట్స్ కమిషన్‌కు కొన్ని ముఖ్యమైన ఆదేశాలు జారీ చేసింది.
విద్యార్థులపై కుల వివక్షకు అడ్డుకట్ట వేసేందుకు దేశవ్యాప్తంగా కేంద్ర, రాష్ట్ర, ప్రయివేటు, డీమ్డ్ యూనివర్సిటీల్లో ఆచరణకు సరిపోయే విధానాలను రూపొందించాల్సిందిగా యూజీసీకి సూచించింది.
2012లో రూపొందించిన 'ఇక్వల్ అపార్చునిటీ యూనిట్స్' ప్రకారం ఇప్పటి వరకు ఎన్ని యూనిట్స్ ఏర్పాటు చేశారో డేటాను సమర్పించాలని కోరింది.
Details
సరైన విచారణ జరగలేదు
విద్యాసంస్థల్లో వివక్షకు సంబంధించి వచ్చిన ఫిర్యాదులు, వాటిపై తీసుకున్న చర్యల వివరాలను ఆరు వారాల్లోగా సమర్పించాల్సిందిగా ఆదేశాలు ఇచ్చింది.
ఈ అంశంపై ఇప్పటికే 2019లో పిటిషన్ దాఖలైనప్పటికీ ఇప్పటి వరకు సరైన విచారణ జరగలేదని సుప్రీంకోర్టు పేర్కొంది.
పిటిషన్‌పై ఇప్పుడు క్రమం తప్పకుండా విచారణ చేయబోతున్నట్లు జస్టిస్ సూర్యకాంత్ తెలిపారు. సీనియర్ అడ్వకేట్ ఇందిరా జైసింగ్ న్యాయస్థానానికి వెల్లడించిన వివరాలు కంటతడి పెట్టించేలా ఉన్నాయి.
2004 నుంచి వివిధ ఐఐటీలతో పాటు ఇతర ఉన్నత విద్యాసంస్థల్లో 50 మంది విద్యార్థులు కుల వివక్ష కారణంగా ఆత్మహత్యకు పాల్పడ్డారు.
వారిలో మెజారిటీ ఎస్సీ, ఎస్టీ విద్యార్థులే. జైసింగ్ రోహిత్ వేముల, పాయల్ తాడ్వీ వంటి విద్యార్థుల తరపున వాదనలు వినిపించారు.
Details
విద్యార్థులకు సమాన అవకాశాలు కల్పించాలి
ఈ కేసులు విద్యాసంస్థల్లో కుల వివక్ష పరిస్థితుల తీవ్రతను మరింత బహిర్గతం చేశాయి.
కుల వివక్ష రూపుమాపడం కేవలం ఒక అంశంగా కాకుండా సమాజంలో మార్పు తీసుకురావాల్సిన సమగ్ర ప్రయత్నంగా ఉండాలని సుప్రీంకోర్టు తేల్చి చెప్పింది.
విద్యార్థులకు సమాన అవకాశాలు కల్పించేందుకు ప్రభుత్వం, యూనివర్సిటీలు చిత్తశుద్ధితో పనిచేయాల్సిన అవసరం ఉందని ధర్మాసనం స్పష్టం చేసింది.
విద్యాసంస్థల్లో విద్యార్థులు కులం, జాతి, మతం, లింగం అనే విభజనలకు అతీతంగా సమానత్వంతో ఎదగాలని ఆశిస్తున్న సుప్రీంకోర్టు ఆదేశాలు ఈ అంశంపై దేశవ్యాప్తంగా చర్చలకు దారితీస్తున్నాయి.
ఒకవేళ ఈ విధానాలు సమర్థవంతంగా అమలు అయితే, భారత విద్యా వ్యవస్థలో ఒక కొత్త అధ్యాయానికి నాంది పలికే అవకాశం ఉంది.