రూ. 7 కోట్ల ఇన్సూరెన్స్ డబ్బుల కోసం ప్రభుత్వ ఉద్యోగి మర్డర్ డ్రామా
మెదక్ జిల్లా వెంకటాపూర్ గ్రామ శివార్లలోని కొండగట్టులో కారు దగ్ధమై, ప్రభుత్వ ఉద్యోగి మృతి చెందిన ఘటనలో షాకింగ్ విషయం వెలుగులోకి వచ్చింది. ఆ ప్రభుత్వ ఉద్యోగి చనిపోలేదని రూ. 7కోట్ల ఇన్సూరెన్స్ డబ్బుల కోసం ఈ మర్డర్ డ్రామాకు తెరలేపాడని పోలీసుల విచారణలో తేలింది. తెలంగాణ సెక్రటేరియట్‌లో ఏఎస్‌ఓగా పనిచేస్తున్న ధర్మానాయక్ ఆన్‌లైన్ గేమ్స్, బెట్టింగ్‌లకు అలవాటు పడి రూ.కోట్లలో అప్పుల పాలయ్యాడు. పథకం ప్రకారం, గతేడాది రూ.7.4కోట్ల విలువైన 25 బీమా పాలసీలను తీసుకున్నాడు. బీమా మొత్తాన్ని క్లెయిమ్ చేసేందుకు ఈనెల 9న కొండగట్టు వద్ద కారులో ఓ వ్యక్తిని తగలబెట్టి, తానే చనిపోయినట్లు సనీఫక్కీలో భారీ మోసానికి ధర్మానాయక్ తెరలేపాడు. దీనికి కుటుంబ సభ్యులు కూడా సహకరించారు.
మరి కారులో చనిపోయింది ఎవరు? పోలీసుల విచారణలో విస్తుపోయే వాస్తవాలు వెల్లడి
ధర్మానాయక్‌ది అనుమానాస్పద మృతిగా కేసు నమోదు చేసి అన్ని కోణాల్లో దర్యాప్తు చేపట్టారు. విచారణలో భాగంగా అతని పేరిట భారీ మొత్తంలో ఇన్సూరెన్స్ పాలిసీలు ఉన్నట్లు తెలిసింది. ఈక్రమంలో అనుమానం వచ్చిన పోలీసులు ధర్మానాయక్ భార్య ఫోన్‌ను ట్యాప్ చేశారు. కొన్ని రోజుల తర్వాత పుణె నుంచి ధర్మానాయక్ భార్యకు ఫోన్ వచ్చినట్లు పోలీసుల గుర్తించారు. ఆ కాల్ డేటాను విశ్లేషించగా, అతను ధర్మానాయక్ అనే షాకింగ్ విషయం తెలిసింది. అనంతరం ధర్మానాయక్‌‌తోపాటు అతని భార్య, ఇద్దరు బంధువులతో పాటు మరో నలుగురిని అధికారికంగా అరెస్టు చేసినట్లు పోలీసులు తెలిపారు. గుర్తు తెలియనని వ్యక్తిని బంధువుల సాయంతో హత్య చేసి, కారులో కూర్చొబెట్టి, అనంతరం వాహనంపై పెట్రోల్ పోసి కాలబెట్టినట్లు పోలీసులు తెలిపారు.
