Banakacherla Project: రేపు తెలుగు రాష్ట్రాల సీఎంల భేటీ.. కేంద్రానికి లేఖ రాసి ఏపీకి షాక్ ఇచ్చిన తెలంగాణ..
ఈ వార్తాకథనం ఏంటి
ఏపీ ప్రభుత్వానికి తెలంగాణ ప్రభుత్వం తీవ్రమైన షాక్ ఇచ్చింది. బనకచర్ల ప్రాజెక్టుకు సంబంధించి చర్చకు తాము సిద్ధం కాదని స్పష్టం చేస్తూ, కేంద్రానికి తెలంగాణ ప్రభుత్వం లేఖ రాసింది. బనకచర్ల ప్రాజెక్టుపై జీఆర్ఎంబీ (గ్రేటర్ రివర్ మేనేజ్‌మెంట్ బోర్డు), సీడబ్ల్యూసీ (సెంట్రల్ వాటర్ కమిషన్), ఈఏసీ (ఎక్స్పర్ట్ అప్రైజల్ కమిటీ) ఇప్పటికే అభ్యంతరాలు వ్యక్తం చేశాయని తెలంగాణ ప్రభుత్వం లేఖలో వివరించింది. బనకచర్ల ప్రాజెక్టుకు ఇప్పటి వరకు ఎలాంటి అనుమతులు పొందలేదని స్పష్టంగా పేర్కొంది. చట్టాలను, ట్రిబ్యునల్ ఇచ్చిన తీర్పులను ఉల్లంఘిస్తున్న ప్రాజెక్టు అయిన బనకచర్లపై చర్చించే అవసరమే లేదని కేంద్రానికి తెలంగాణ ప్రభుత్వం లేఖ ద్వారా తెలిపింది.
వివరాలు
తుమ్మడిహెట్టి వద్ద నిర్మించిన ప్రాణహిత ప్రాజెక్టుకు 80 టీఎంసీల నీటి కేటాయింపు
జులై 16న ఢిల్లీలో కేంద్ర మంత్రి సమక్షంలో జరగనున్న తెలంగాణ, ఏపీ ముఖ్యమంత్రుల సమావేశానికి ఏపీ ప్రభుత్వం బనకచర్ల ప్రాజెక్టును సింగిల్ ఎజెండాగా ముందుంచింది. ఇప్పటికే తెలంగాణ ప్రభుత్వం కృష్ణా నదిపై పెండింగ్‌లో ఉన్న ప్రాజెక్టులకు అనుమతుల విషయాన్ని, నీటి కేటాయింపులను, గతంలో కేంద్ర ప్రభుత్వం ఇచ్చిన హామీల మేరకు పాలమూరు-రంగారెడ్డి, డిండి ప్రాజెక్టులను నేషనల్ ప్రాజెక్టులుగా గుర్తించే అంశాన్ని, తుమ్మడిహెట్టి వద్ద నిర్మించిన ప్రాణహిత ప్రాజెక్టుకు 80 టీఎంసీల నీటి కేటాయింపు, ఏబీఐపీ నిధుల మంజూరు, ఇచ్చంపల్లి వద్ద 200 టీఎంసీల వరద నీటి వినియోగానికి కొత్త ప్రాజెక్టు నిర్మాణం తదితర అంశాలతో కూడిన ఎజెండాను ఇప్పటికే కేంద్రానికి పంపింది.
వివరాలు
బనకచర్ల ప్రాజెక్టును చర్చించాల్సిన అవసరం లేదు: తెలంగాణ ప్రభుత్వం
అయితే, ఏపీ ప్రభుత్వం ప్రతిపాదించిన బనకచర్ల ఎజెండాపై అభ్యంతరం వ్యక్తం చేస్తూ తెలంగాణ ప్రభుత్వం ఈరోజు ఉదయం కేంద్రానికి మరో లేఖ పంపింది. రేపటి సమావేశంలో బనకచర్ల ప్రాజెక్టును చర్చించాల్సిన అవసరం లేదని తెలంగాణ ప్రభుత్వం ఆ లేఖలో స్పష్టంగా తెలిపింది. జీఆర్ఎంబీ, సీడబ్ల్యూసీ, ఈఏసీ ఇప్పటికే బనకచర్లపై అభ్యంతరాలు వ్యక్తం చేశాయని, ప్రాజెక్టుకు అనుమతులేమీ లేవని తెలంగాణ ప్రభుత్వం వివరించింది. చట్టాలను, ట్రిబ్యునల్ తీర్పులను ఉల్లంఘించే ఈ ప్రాజెక్టుపై చర్చ అవసరం లేదని పేర్కొంది. గోదావరి-బనకచర్ల లింక్ ప్రాజెక్టుపై చర్చించడమేదీ తగదని కేంద్రానికి వివరించింది. ఇలాంటి చర్యలు కేంద్ర నియంత్రణ సంస్థల ప్రతిష్టను, విశ్వసనీయతను దెబ్బతీయనున్నాయన్న అంశాన్ని తెలంగాణ ప్రభుత్వం తన లేఖలో స్పష్టంగా పేర్కొంది.