Telangana: చంద్రబాబు నేతృత్వంలో తెలంగాణ టీడీపీ నేతల భేటీ.. జూబ్లీహిల్స్ ఉపఎన్నికల్లో తటస్థ వైఖరికి నిర్ణయం
ఈ వార్తాకథనం ఏంటి
తెలంగాణ టీడీపీ నేతలతో ఆ పార్టీ జాతీయ అధ్యక్షుడు, ఆంధ్రప్రదేశ్ ముఖ్యమంత్రి నారా చంద్రబాబు నాయుడు మంగళవారం ఉండవల్లిలో సమావేశమయ్యారు. ఈ సమావేశానికి తెలంగాణలోని పలు జిల్లాల ముఖ్య నాయకులు హాజరయ్యారు. సుదీర్ఘ విరామం అనంతరం జరిగిన ఈ భేటీ సందర్భంగా రాష్ట్ర టీడీపీ అధ్యక్షుని నియామకం, పార్టీ సంస్థాగత నిర్మాణం, భవిష్యత్తు వ్యూహాలు వంటి కీలక అంశాలపై విస్తృతంగా చర్చ జరిగింది. నేతల సమాచారం ప్రకారం, ప్రస్తుతం తెలంగాణలో ఇప్పటికే 1.78 లక్షల మంది పార్టీ సభ్యత్వం పొందారని చంద్రబాబుకు వివరించారు. పార్టీని గ్రామ స్థాయిలో బలోపేతం చేయాలంటే రాష్ట్ర, జిల్లా, మండల స్థాయి కమిటీల నియామకాలు త్వరగా పూర్తి చేయడం అవసరమని నేతలు అభిప్రాయపడ్డారు.
వివరాలు
తెలంగాణ టీడీపీ అధ్యక్షుని నియామకం
రాష్ట్ర అధ్యక్షుడి నియామకం ఆలస్యం అయితే తాత్కాలికంగా రాష్ట్ర స్థాయిలో సమన్వయ కమిటీ ఏర్పాటు చేయాలనే ప్రతిపాదనను కూడా వారు ముందుపెట్టారు. ఈ సందర్భంగా చంద్రబాబు మాట్లాడుతూ, "పార్టీని పునరుజ్జీవింపజేయాలంటే గ్రామ స్థాయిలోనే పునాది బలంగా ఉండాలి. సమర్థవంతమైన నాయకత్వం కనబరుస్తున్న వారికి తగిన బాధ్యతలు అప్పగిస్తాం" అని స్పష్టం చేశారు. ఆయన సూచనల మేరకు త్వరలోనే తెలంగాణ టీడీపీ అధ్యక్షుని నియామకం జరిగే అవకాశం ఉందని పార్టీ వర్గాలు వెల్లడించాయి. అదేవిధంగా, జూబ్లీహిల్స్ ఉపఎన్నికల విషయంలో పార్టీ తటస్థంగా ఉండాలని ఈ సమావేశంలో నిర్ణయం తీసుకున్నారు.
వివరాలు
తెలంగాణ టీడీపీ అధ్యక్ష పదవికి అరవింద్ కుమార్ గౌడ్
అయితే, బీజేపీ అధికారికంగా మద్దతు కోరితే, ఆ నియోజకవర్గంలో వారికి సహకారం అందించడానికి సిద్ధంగా ఉన్నామని నేతలు స్పష్టం చేశారు. అలాగే రాబోయే స్థానిక సంస్థల ఎన్నికల్లో టీడీపీ బలం ఉన్న ప్రాంతాల్లో చురుకుగా పోటీ చేసేందుకు సిద్ధంగా ఉండాలని చంద్రబాబు సూచించారు. తెలంగాణ టీడీపీ అధ్యక్ష పదవికి అరవింద్ కుమార్ గౌడ్ పేరు ముందంజలో ఉందని పార్టీ అంతర్గత వర్గాలు తెలిపాయి.