Telegram: నీట్ పరీక్షకు ముందు టెలిగ్రామ్పై నిషేధం.. ఢిల్లీ హైకోర్టును ఆశ్రయించిన సంస్థ
ఈ వార్తాకథనం ఏంటి
నీట్ (యూజీ) 2026 రీ-ఎగ్జామ్కు ముందు కేంద్ర ప్రభుత్వం విధించిన తాత్కాలిక నిషేధాన్ని సవాల్ చేస్తూ టెలిగ్రామ్ ఢిల్లీ హైకోర్టును ఆశ్రయించింది. జూన్ 22 వరకు దేశవ్యాప్తంగా టెలిగ్రామ్ సేవలను నిలిపివేయాలన్న కేంద్ర ప్రభుత్వ నిర్ణయాన్ని వ్యతిరేకిస్తూ పిటిషన్ దాఖలు చేసింది. ఈ కేసు జస్టిస్ తేజస్ కరియా సెలవుల ధర్మాసనం ముందుకు రాగా, అత్యవసర విచారణకు కోర్టు అంగీకరించింది. కాగా, నీట్ రీ-ఎగ్జామ్ జూన్ 21న జరగనుంది.
వివరాలు
తప్పుడు ప్రచారాన్ని అడ్డుకునేందుకే నిర్ణయం
జాతీయ పరీక్షల సంస్థ (ఎన్టీఏ), విద్యాశాఖ సిఫార్సుల మేరకు కేంద్ర ప్రభుత్వం ఈ నిర్ణయం తీసుకుంది. కొందరు టెలిగ్రామ్ గ్రూపులు, ఛానెళ్ల ద్వారా నీట్ ప్రశ్నపత్రం లీక్ అయిందంటూ తప్పుడు ప్రచారం చేస్తూ విద్యార్థులు, తల్లిదండ్రులను తప్పుదోవ పట్టిస్తున్నారని అధికారులు చెబుతున్నారు. పరీక్షకు ముందు ఇలాంటి వదంతులు వ్యాపించకుండా చూడటమే ఈ చర్య లక్ష్యమని ప్రభుత్వం స్పష్టం చేసింది. విద్యార్థులు ఎలాంటి గందరగోళం లేకుండా ప్రశాంత వాతావరణంలో పరీక్ష రాయడానికి ఈ చర్యలు అవసరమని పేర్కొంది.
వివరాలు
పాత సందేశాల ఎడిటింగ్ ఫీచర్పైనా ఆంక్షలు
టెలిగ్రామ్కు మరో కీలక ఆదేశాన్ని కూడా కేంద్ర ప్రభుత్వం జారీ చేసింది. భారతీయ వినియోగదారుల కోసం జూన్ 30 వరకు పాత సందేశాలను సవరించే (ఎడిట్) సదుపాయాన్ని నిలిపివేయాలని సూచించింది. కొందరు ముందుగా సాధారణ సందేశాలు పోస్టు చేసి, తర్వాత వాటిని మార్చి ప్రశ్నపత్రాలు లేదా ఇతర సమాచారాన్ని జోడిస్తున్నట్లు దర్యాప్తులో గుర్తించినట్లు అధికారులు తెలిపారు. అనంతరం పాత టైమ్స్టాంప్లతో ఉన్న స్క్రీన్షాట్లను చూపించి ప్రశ్నపత్రం ముందే లీక్ అయిందంటూ ప్రచారం చేస్తున్నారని వెల్లడించారు. ఇలాంటి తప్పుడు ప్రచారాన్ని అరికట్టేందుకు ఈ చర్యలు చేపట్టినట్లు పేర్కొన్నారు.
వివరాలు
ప్రశ్నపత్రాలు ఇస్తామంటూ లక్షల రూపాయల వసూళ్లు
టెలిగ్రామ్లో అనేక ఛానెళ్లు నీట్ ప్రశ్నపత్రాలను అందిస్తామంటూ ప్రచారం చేస్తున్నట్లు అధికారులు గుర్తించారు. ఇందుకోసం విద్యార్థులు, వారి కుటుంబాల నుంచి వేల నుంచి లక్షల రూపాయల వరకు డిమాండ్ చేస్తున్నట్లు సమాచారం. పలువురు ఛానెళ్లపై చర్యలు తీసుకున్నప్పటికీ సమస్య పూర్తిగా అదుపులోకి రాలేదని ఎన్టీఏ వెల్లడించింది. దీంతో పరీక్షల నిర్వహణ కాలంలో పరిమిత వ్యవధి పాటు టెలిగ్రామ్ సేవలపై తాత్కాలిక ఆంక్షలు విధించాలని కేంద్ర ప్రభుత్వం నిర్ణయించింది.