పోర్న్ వీడియోలు చూసిన BJP ఎమ్మెల్యే.. త్రిపుర అసెంబ్లీలో రచ్చ
అధికార బీజేపీ ఎమ్మెల్యే పోర్న్ వీడియో చూసిన ఘటనపై త్రిపుర అసెంబ్లీలో శుక్రవారం మధ్యాహ్నం పెద్ద రచ్చ జరిగింది. బాగ్‌బస్సా నియోజకవర్గానికి చెందిన బీజేపీ ఎమ్మెల్యే జాదవ్ లక్‌నాథ్ అసెంబ్లీలో పోర్న్ వీడియో చూడటంతో ప్రతిపక్ష ట్రిప మోతా పార్టీ ఇవాళ అసెంబ్లీలో చర్చకు పట్టుబడింది. అశ్లీల వీడియోలు చూస్తూ అసెంబ్లీ పరువును మంటగలిపిన బీజేపీ ఎమ్మెల్యేపై చర్యలు తీసుకోవాలని డిమాండ్ చేశారు. దీనిపై బీజేపీ అభ్యంతరం తెలపగా.. ట్రిప మోతా, కాంగ్రెస్, సీపీఎం ఎమ్మెల్యేలు అసెంబ్లీలో నిరసనకు దిగారు. దీంతో స్పీకర్ ఐదుగురు సభ్యులను సస్పెండ్ చేయడంతో ప్రతిపక్ష సభ్యులు మరింత రెచ్చిపోయి రచ్చ చేశారు.
స్పీకర్ నిర్ణయాన్ని నిరసిస్తూ ప్రతిపక్ష సభ్యులు వాకౌట్
దీనిపై అధికార బీజేపీ సభ్యులు అభ్యంతరం వ్యక్తం చేశారు. దీంతో ప్రతిపక్ష కాంగ్రెస్, సీపీఎం సభ్యులు కూడా టిప్ర మోతా పార్టీ సభ్యులతో కలిసి అధికార పార్టీపై విమర్శలు గుప్పించారు. ఈ సందర్భంగా ఒకరినొకరు ఇష్టం వచ్చినట్లు దూషించుకున్నారు. సభ్యుల అరుపులు, కేకలతో కాసేపు అసెంబ్లీ దద్దరిల్లింది. సస్పెండ్ అయిన ఐదుగురిలో ముగ్గురు మోతా పార్టీ ఎమ్మెల్యేలు, మిగతా ఇద్దరిలో ఒకరు కాంగ్రెస్ పార్టీ ఎమ్మెల్యే కాగా, మరొకరు సీపీఎం ఎమ్మెల్యే, స్పీకర్ నిర్ణయాన్ని నిరసిస్తూ మిగతా ప్రతిపక్ష సభ్యులంతా సభ నుంచి వాకౌట్ చేశారు.
