Polavaram: ప్రత్యేక ల్యాబ్ ఏర్పాటుకు టెండర్లు.. విదేశీ నిపుణుల సిఫార్సులతో చర్యలు
ఈ వార్తాకథనం ఏంటి
పోలవరం ప్రాజెక్టు నిర్మాణ పనుల్లో నాణ్యత నియంత్రణ పర్యవేక్షణ బాధ్యతలను ఇకపై మూడో పక్ష సంస్థకు అప్పగించాలనే దిశగా చర్యలు కొనసాగుతున్నాయి. ఇందుకోసం ప్రాజెక్టు ప్రాంగణంలోనే ప్రత్యేకంగా ల్యాబొరేటరీ ఏర్పాటు చేయాలని భావిస్తున్నారు. ఈ ల్యాబ్ ద్వారా కేంద్ర జలసంఘం, జలవనరుల శాఖ, విదేశీ నిపుణులు సూచించిన ప్రమాణాలకు అనుగుణంగా టెస్టులు జరిపించి, వారి నివేదికల ఆధారంగా నిర్ణయాలు తీసుకునే విధంగా వ్యవస్థ అమలులోకి రానుంది. ప్రస్తుతం ఈ పనులను ప్రధానంగా మేఘా కంపెనీ నిర్వహిస్తోంది.డయాఫ్రం వాల్‌ పనులను బావర్‌ సంస్థ చేపడుతుండగా,బట్రస్‌ డ్యామ్‌ నిర్మాణం సహా ఇతర భాగాలను మేఘా కంపెనీ కొనసాగిస్తోంది. ఈ క్రమంలో ప్రాజెక్టు పనుల నాణ్యతను గుత్తేదారు సంస్థే పరిశీలించి నివేదికలు సమర్పిస్తోంది.
వివరాలు
మూడు నెలలు గడచినా ల్యాబ్ ఏర్పాటులో పురోగతి లేదు
ఈ పనుల్లో వ్యాప్కోస్‌, రాష్ట్ర నాణ్యత నియంత్రణ విభాగం అధికారులు కూడా తనిఖీలు నిర్వహిస్తున్నారు. ప్రాజెక్టు నిర్మాణంలో ఎదురవుతున్న సాంకేతిక సవాళ్ల పరిష్కారానికి కేంద్ర జలసంఘం, ప్రాజెక్టు అథారిటీ సంయుక్తంగా ఓ విదేశీ నిపుణుల బృందాన్ని నియమించాయి. ఈ బృందం డయాఫ్రం వాల్‌ ధ్వంసం, ఎగువ కాఫర్‌ డ్యామ్‌లో లీకేజీలు, ఇతర సమస్యలపై పరిశోధనలు చేసి నివేదికను సమర్పించింది. ఇందులో ప్రాజెక్టులో నాణ్యత నియంత్రణ పద్ధతులపై తీవ్ర విమర్శలు చేయడంతో పాటు స్వతంత్ర ల్యాబ్ ఏర్పాటు చేయాలని సిఫారసు చేశారు. అంతేకాకుండా మూడో పక్ష సంస్థ ద్వారా స్వతంత్ర తనిఖీలు జరగాలని స్పష్టంగా సూచించారు. అయితే ఇప్పటికే మూడు నెలలు గడిచినా ల్యాబ్ ఏర్పాటు పూర్తికాలేదు.
వివరాలు
రూ. కోటిన్నర వరకు వ్యయం
మూడో పక్ష ల్యాబ్ ఏర్పాటుకు రాష్ట్ర జలవనరుల శాఖ, ప్రాజెక్టు అథారిటీ అధికారులు కలిసి అవసరమైన వ్యయ అంచనాలు సిద్ధం చేశారు. ల్యాబ్ ఏర్పాటుకు సుమారుగా రూ.3 కోట్లు ఖర్చవుతుందని అంచనా వేయబడింది. అయితే ప్రాజెక్టు పూర్తయిన తర్వాత ల్యాబ్ అవసరం ఉండకపోవచ్చని భావించి, స్వతంత్ర సంస్థలే ల్యాబ్ ఏర్పాటుచేసి, వారు చేసిన పరీక్షల ప్రకారం మాత్రమే ఛార్జీలు వసూలు చేసే విధంగా ప్రతిపాదనలు రూపొందించారు. ల్యాబ్ ప్రాజెక్టు పూర్తయ్యాక ఆయా సంస్థలకు చెందుతుంది. వార్షికంగా ఎన్ని పరీక్షలు చేయాలో అంచనా వేయగా, దాదాపుగా రూ.1.50 కోట్లు ఖర్చవుతుందని తేలింది. ప్రస్తుతం దీనికి సంబంధించి కొటేషన్లు ఆహ్వానించగా, తిరుపతి ఐఐటీ, నేషనల్‌ బిల్డింగ్‌ కనస్ట్రక్షన్‌ కార్పొరేషన్‌లు ఆసక్తి చూపాయి.
వివరాలు
కుడి వైపు సొరంగాల్లో నిపుణుల తనిఖీ
ఈ సంస్థల అర్హతలు, వారు పేర్కొన్న ధరల వివరాలను పరిశీలించిన తర్వాత తుది నిర్ణయం తీసుకోనున్నారు. పోలవరం ప్రాజెక్టులో భాగంగా కుడివైపు నిర్మిస్తున్న జంట సొరంగాల్లో ఒకటి కుంగిపోయిన నేపథ్యంలో గురువారం నిపుణుల కమిటీ ప్రత్యక్షంగా పరిశీలనలు నిర్వహించింది. మట్టి సరైన స్థాయిలో లేనందునే ఈ సమస్య తలెత్తినట్లు గుర్తించారు. ప్రస్తుతం అక్కడ ప్రత్యామ్నాయ నిర్మాణాల కోసం పరిశీలనలు చేపట్టారు. ఈ కమిటీలో కేంద్ర జలసంఘం సీఈ రమేష్‌బాబు,నాణ్యత నియంత్రణ విభాగ సీఈ శేషుబాబు,ఎస్‌ఈ తిరుమలరావు,పోలవరం సీఈ నరసింహమూర్తి, సీఈ సీడీఓ తదితరులు ఉన్నారు. సొరంగం కుంగిన ప్రాంతంలో రిబ్స్‌ను ఏర్పాటు చేసి, వాటికి కాంక్రీటు పోసి, తర్వాత లైనింగ్‌ చేయాలని కమిటీ నిర్ణయం తీసుకుంది. ఈ ప్రక్రియకు కమిటీ ఆమోదం తెలిపింది.