చంద్రబాబు అరెస్టుపై జూనియర్ ఎన్టీఆర్ స్పందించలేదు..చిరంజీవి, ప్రభాస్ ట్వీట్ చేస్తే చాలు
ఆంధ్రప్రదేశ్ ప్రతిపక్ష నేత చంద్రబాబు అరెస్టును వ్యతిరేకిస్తూ జూనియర్ ఎన్టీఆర్ స్పందించలేదని నిర్మాత నట్టికుమార్ అన్నారు. చిరంజీవి, ప్రభాస్ సహా దర్శకుడు రాజమౌళిలు ట్వీట్ చేయలేదన్నారు. ఈ తీరు తనను ఎంతో బాధ కలిగించిందన్నారు. స్కిల్ డెవలప్‌మెంట్ స్కామ్‌లో ఏపీ మాజీ ముఖ్యమంత్రి చంద్రబాబు జ్యుడీషియల్‌ రిమాండ్ లో ఉండటంపై సినీ నిర్మాత నట్టికుమార్ ఆందోళన వ్యక్తం చేశారు. చిత్ర పరిశ్రమ సంక్షేమం కోసం చంద్రబాబు ముందుండే వ్యక్తి అని ఆయన గుర్తు చేసుకున్నారు. కష్టాల్లో ఉన్నవారికి అండగా నిలబడటం మానవత్వమని హితవు పలికారు. చిరంజీవి, రాజమౌళి, ప్రభాస్ లాంటి వ్యక్తులు మద్దతుగా ఒక్క ట్వీట్ చేస్తే చాలన్నారు.
పవన్ కల్యాణ్ పెద్ద కొడుకులా ముందడుగు వేశారు : నట్టి
చంద్రబాబు అరెస్ట్ పై టాలీవుడ్ పెద్దల తీరు బాగోలేదని నిర్మాత నట్టికుమార్ ఆవేదన వ్యక్తం చేశారు. ఇప్పటికే పవన్ కల్యాణ్ పెద్ద కొడుకులా ముందడుగు వేశారన్నారు. ఈ మేరకు చంద్రబాబుకి మద్దతుగా నిలిచారని కొనియాడారు. వెనుకాల నుంచి మద్దతు తెలిపేవారు దొంగలని నట్టి మండిపడ్డారు. ముందుండి మద్దతిచ్చిన పవన్ కల్యాణ్ హీరో అనిపించుకున్నట్లు ఆయన ప్రశంసించారు. టీడీపీకి తాను దూరంగా ఉంటున్నా, పార్టీ అధినేత చంద్రబాబు మంచి వైఖరికి ఎల్లప్పుడూ దగ్గరగానే ఉంటానన్నారు. ఇలాంటి నాయుకుడు ఉండాల్సింది జైల్లో కాదని, ప్రజల్లో ఉండాలన్నారు. ప్రజలకు ఏపీ సీఎం వైఎస్ జగన్ ప్రమాదకరమని నట్టి తీవ్ర ఆందోళన వ్యక్తం చేశారు.
