TTD: తిరుమలలో భక్తులకు వేసవి ఏర్పాట్లు.. వేసవి కాలంలో ఈ దర్శన టికెట్లు తగ్గింపు
వేసవి సెలవుల్లో తిరుమల శ్రీవారి దర్శనార్థం విశేషంగా విచ్చేస్తున్న భక్తులకు ఎలాంటి అసౌకర్యం కలగకుండా విస్తృతంగా ఏర్పాట్లు చేపట్టామ‌ని టీటీడీ ఈవో ఎవి.ధర్మారెడ్డి తెలిపారు. దేశవ్యాప్తంగా వేసవి సెలవుల కారణంగా ఏప్రిల్‌ నుంచి జూలై వరకు భక్తుల రద్దీ ఎక్కువగా ఉంటుంది. అందువల్ల సామాన్య భక్తులకు అధిక ప్రాధాన్యత కల్పిస్తూ విఐపి బ్రేక్‌, శ్రీవాణి, టూరిజం కోటా, వర్చువల్‌ సేవలు, రూ.300 దర్శన టికెట్లు తగ్గించమని టీటీడీ కార్యనిర్వహణాధికారి ఏవీ ధర్మారెడ్డి శనివారం తెలిపారు. క్యూలైన్ల వద్ద తాత్కాలిక షేడ్స్ , షెల్టర్లు ఏర్పాటు చేయడంతో పాటు భక్తులకు తాగునీరు, ఇతర సౌకర్యాలు కల్పిస్తామని తెలిపారు.
గోవిందరాజ స్వామి ఆలయంలో టీటీడీ ఉచిత 'అన్న ప్రసాదం'
వసతి గురించి ఈఓ మాట్లాడుతూ సాధారణ భక్తుల కోసం 85 శాతం గదులు కేటాయించామన్నారు. కొండలపై 7,500 గదులు ఉన్నాయని, ఏ సమయంలోనైనా 45 వేల మంది భక్తులు కూర్చునేందుకు వీలుగా ఉందన్నారు. వేసవిలో తిరుమలలో వసతి పరిమితంగా ఉంటుంది కాబట్టి , భక్తులు తిరుపతిలోనే వసతి పొందాలని టీటీడీ సూచించింది. వేసవి డిమాండ్‌ను తీర్చేందుకు తిరుపతిలోని గోవిందరాజ స్వామి ఆలయంలో టీటీడీ ఉచిత 'అన్న ప్రసాదం' పంపిణీని ప్రారంభించింది.
