AP Rains: బంగాళాఖాతంలో రెండు అల్పపీడనాలు.. రెండు రోజుల్లో తుపాను ఏర్పడే అవకాశం
ఈ వార్తాకథనం ఏంటి
బంగాళాఖాతంలోని తాజా వాతావరణ మార్పులు నిపుణులను ఆశ్చర్యానికి గురిచేస్తున్నాయి. ఇప్పటికే ఒక అల్పపీడనం క్రియాశీలంగా ఉండగానే, మరో కొత్త అల్పపీడనం ఏర్పడే సంకేతాలు కనిపిస్తున్నాయి. ఈ రెండు వ్యవస్థలు ఒకదానికొకటి ప్రభావం చూపే పరిస్థితి ఏర్పడవచ్చని, రాబోయే రోజుల్లో ఇవి కలిసిపోయే అవకాశమున్నట్లు సూచనలు వెలువడుతున్నాయి. ప్రస్తుతం మలక్కా జలసంధి దగ్గర తీవ్ర అల్పపీడనం చురుగ్గా కొనసాగుతోంది. ఇది పశ్చిమ-వాయవ్య దిశలో ప్రయాణించి, మంగళవారం నాటికి వాయుగుండంగా మారి, గురువారానికి తుపానుగా అభివృద్ధి చెందవచ్చని భారత వాతావరణ శాఖ అంచనా వేస్తోంది. తుపానుగా మారడానికి అనుకూల వాతావరణ పరిస్థితులు ఉన్నాయని నిపుణులు పేర్కొంటున్నారు. అయితే దీని పూర్తి గమనం, ప్రభావంపై స్పష్టత రావడానికి ఇంకా కొంత సమయం పడుతుందని తెలిపారు.
వివరాలు
తుపానుగా బలపడిన తరువాతే..
గత గణాంకాలు చెబుతున్నట్లుగా, నవంబర్‌లో ఏర్పడే తుపాన్లు తరచుగా పశ్చిమబెంగాల్ లేదా బంగ్లాదేశ్ వైపు సాగుతాయి. కొన్నిసార్లు మాత్రం ఆంధ్రప్రదేశ్ లేదా తమిళనాడు తీరాలను చేరుతాయి. సాధారణంగా అల్పపీడనం ఒక్కసారి ఏర్పడితే దాని దిశ, ప్రవర్తనపై కొంత స్పష్టత లభిస్తుంది. కానీ ఈసారి ఇంకా స్పష్టత లేకపోవడంతో, ఇది తుపానుగా బలపడిన తరువాతే దాని ఖచ్చితమైన దిశ, తీరం దాటే ప్రాంతం వంటి వివరాలు చెప్పగలమని వాతావరణ శాస్త్రజ్ఞులు వెల్లడించారు.
వివరాలు
29 తర్వాత భారీ వర్షాలు
కొమొరిన్ పరిసరాల్లో ఉపరితల ఆవర్తనం కొనసాగుతోంది. దీని ప్రభావంతో మంగళవారం నైరుతి బంగాళాఖాతంలోని కొమొరిన్-శ్రీలంక ప్రాంతాల వద్ద ఒక కొత్త అల్పపీడనం ఏర్పడే అవకాశం ఉందని ఐఎండీ తెలిపింది. ఇది తరువాత మరింత బలపడే సూచనలు ఉన్నాయి. ఈ ప్రభావంతో మంగళవారం, బుధవారం రోజుల్లో కేరళ,తమిళనాడు రాష్ట్రాల్లో భారీ వర్షాలు కురిసే అవకాశముందని వాతావరణ శాఖ హెచ్చరించింది. 29వ తేదీన: రాయలసీమ, దక్షిణ తీర ఆంధ్ర ప్రాంతాల్లో భారీ వర్షాల అవకాశం ఉంది. 30వ తేదీన: బాపట్ల, ప్రకాశం, నెల్లూరు, వైఎస్‌ఆర్ కడప, అన్నమయ్య, తిరుపతి, చిత్తూరు జిల్లాల్లో భారీ నుంచి అతిభారీ వర్షాలు కురిసే అవకాశం ఉందని అంచనా వేస్తోంది.
వివరాలు
రెండు వ్యవస్థలపై తాజా అంచనాలు
సముద్రం అలజడిగా మారనున్న నేపథ్యంలో గురువారం, శుక్రవారం రోజుల్లో మత్స్యకారులు వేటకు వెళ్లకూడదని ఐఎండీ సూచించింది. ఇప్పటికే సముద్రంలో ఉన్నవారు గురువారం లోపల ఒడ్డుకు చేరాలని హెచ్చరిక జారీ చేసింది. మలక్కా జలసంధి సమీపంలో కొనసాగుతున్న తీవ్ర అల్పపీడనం వాయుగుండంగా మారి ఈ నెల 30 నాటికి క్రమంగా బలహీనపడవచ్చని పలు వాతావరణ నమూనాలు సూచిస్తున్నాయి. ఇక కొమొరిన్ ప్రాంతంలో ఏర్పడబోతున్న మరొక అల్పపీడనం తరువాత బలపడి, డిసెంబర్ 1 నాటికి తమిళనాడు-దక్షిణ ఆంధ్రాదేశం మధ్యలోని తీరం దాటే అవకాశం ఉన్నట్లు అంచనాలు తెలియజేస్తున్నాయి.