Honeytrap: అమ్మాయి ట్రాప్ లో పడి పాక్‌కు మిలిటరీ రహస్యాలను లీక్‌.. వ్యక్తిని అరెస్టు
ఈ వార్తాకథనం ఏంటి
ఉత్తర్‌ప్రదేశ్‌కు చెందిన రవీంద్ర కుమార్ ఫిరోజాబాద్‌లోని హజ్రత్‌పుర్ ఆర్డినెన్స్ ఫ్యాక్టరీలో మెకానిక్‌గా పని చేస్తున్నాడు.
2023లో నేహా శర్మ అనే మహిళ ఫేస్‌బుక్ ద్వారా అతనికి పరిచయమైంది. పాకిస్థాన్ ఇంటెలిజెన్స్ ఏజెన్సీ (Pak ISI) కోసం పనిచేస్తున్న ఆమె, ఆ విషయాన్ని గోప్యంగా ఉంచి రవీంద్రతో స్నేహం చేసింది.
డబ్బుల ఆశ చూపుతూ అతడిని ప్రేమ ప్రలోభాలకు గురి చేసింది. ఈ క్రమంలో అతడి నుంచి మిలిటరీ రహస్యాలను (Military Secrets) సేకరించినట్లు పోలీసులు దర్యాప్తులో వెల్లడించారు.
రవీంద్ర, నేహా శర్మ నంబరును "చంద్రన్ స్టోర్‌కీపర్" అనే పేరుతో సేవ్ చేసుకుని, వాట్సాప్ ద్వారా ఆమెకు పలు కీలక పత్రాలను పంపించినట్లు గుర్తించారు.
వివరాలు
వాట్సాప్ చాట్‌లను పరిశీలిస్తున్న పోలీసులు
అతడు ఆర్డినెన్స్ ఫ్యాక్టరీ, 51 గోర్ఖా రైఫిల్స్ రెజిమెంట్ అధికారుల నిర్వహించిన లాజిస్టిక్స్ డ్రోన్ పరీక్షలు, రోజువారీ ఉత్పత్తి వివరాలు, స్క్రీనింగ్ కమిటీ పంపిన రహస్య లేఖలను సేకరించి, వాటిని ఆమెకు పంపినట్లు తెలుస్తోంది.
ముఖ్యంగా, గగన్‌యాన్ ప్రాజెక్టుకు సంబంధించిన కీలక వివరాలు కూడా అందించినట్లు పోలీసులు వెల్లడించారు.
అంతేకాకుండా,అతడు పాకిస్థాన్ కేంద్రంగా పనిచేస్తున్న ఐఎస్‌ఐ సభ్యులతో నేరుగా టచ్‌లో ఉన్నట్లు దర్యాప్తులో వెల్లడైంది.
భారత రక్షణ రంగ ప్రాజెక్టులకు సంబంధించిన గూఢ సమాచారం వారికీ అందించివుంటాడని పోలీసులు అనుమానిస్తున్నారు.
నిందితుడితో పాటు అతడి స్నేహితుడిని కూడా అదుపులోకి తీసుకున్నారు.వారి వాట్సాప్ చాట్‌లను పోలీసులు పరిశీలిస్తున్నారు.