Rythu Bharosa : రైతు భరోసా హామీని కచ్చితంగా నేరవేరుస్తాం: భట్టి విక్రమార్క
ఈ వార్తాకథనం ఏంటి
రైతు భరోసా పథకం అమలుకు కాంగ్రెస్ ప్రభుత్వం కట్టుబడి ఉందని రైతు భరోసా సబ్ కమిటీ చైర్మన్‌, డిప్యూటీ సీఎం భట్టి విక్రమార్క స్పష్టం చేశారు.
ఎన్ని ఆర్థిక ఇబ్బందులు ఎదురైనా ఇచ్చిన హామీని నెరవేరుస్తామని స్పష్టం చేశారు.
సచివాలయంలో భట్టి విక్రమార్క అధ్యక్షతన జరిగిన సబ్ కమిటీ సమావేశంలో మంత్రులు తుమ్మల నాగేశ్వరరావు, శ్రీధర్ బాబు, పొంగులేటి శ్రీనివాస్ రెడ్డి హజరయ్యారు.
ఈ సమావేశంలో రానున్న యాసంగి పంటకు రైతు భరోసా అందజేసేందుకు అనుసరించాల్సిన విధి విధానాలపై రెండు గంటలపాటు చర్చించారు.
రైతు బంధు పథకం అమలు తీరును, కేబినెట్ సబ్ కమిటీ పర్యటనల సమయంలో రైతుల నుంచి వచ్చిన అభిప్రాయాలను, అధికారుల సేకరించిన సమాచారాన్ని సమీక్షించారు.
Details
రైతును రక్షించే ప్రభుత్వానిదే
ఎన్ని ఎకరాలకు రైతు భరోసా అమలు చేయాలనే విషయంపై ఇంకా నిర్ణయం తీసుకోలేదని తెలుస్తోంది.
ట్యాక్స్ పేయర్స్‌, ప్రభుత్వ ఉద్యోగులను ఈ పథకానికి అనర్హులుగా ప్రకటించాలని కమిటీ సూచించింది. రైతు భరోసాపై మరొకసారి సమావేశం కావాలని నిర్ణయం తీసుకుంది.
సబ్ కమిటీ భేటీ అనంతరం భట్టి విక్రమార్క మాట్లాడుతూ, ఏడాది పాటు శ్రమించినా ప్రకృతి విపత్తుల కారణంగా పంట చేతికి వస్తుందో రాదో అనే భయాలు రైతులను వేధిస్తున్నాయని అన్నారు.
ఇలాంటి పరిస్థితుల్లో రైతులను రక్షించే బాధ్యత ప్రభుత్వానిదేనని తెలిపారు.
Details
ఆయిల్ ఫామ్ సాగు కోసం రూ.80.10 కోట్లు
పంటల బీమా పథకం కింద ప్రీమియంను పూర్తిగా రాష్ట్ర ప్రభుత్వం రైతుల పక్షాన చెల్లిస్తుందని, పంటలకే కాదు, రైతు కుటుంబాలకు భరోసాగా నిలిచేందుకు ఈ చర్యలు తీసుకుంటున్నామని అన్నారు.
అలాగే, 2024-25లో రాష్ట్రంలో ఒక లక్ష ఎకరాల ఆయిల్ ఫామ్ సాగును చేపట్టాలని లక్ష్యంగా పెట్టుకున్నామని తెలిపారు.
2023-24 సంవత్సరానికి గాను ఆయిల్ ఫామ్ సాగు పథకం కింద కేంద్ర ప్రభుత్వం 80.10 కోట్లు విడుదల చేయగా, రాష్ట్ర వాటాతో కలిపి మొత్తం 133.5 కోట్లు విడుదల చేసినట్లు ప్రకటించారు.