YS Jagan: జగన్ వాహనం కింద సింగయ్య మృతి.. ఫోరెన్సిక్ నివేదిక
ఈ వార్తాకథనం ఏంటి
రాష్ట్రవ్యాప్తంగా తీవ్ర చర్చనీయాంశంగా మారిన దళిత వ్యక్తి సింగయ్య మృతి కేసులో దర్యాప్తు కీలక మలుపు తిరిగింది. పల్నాడు జిల్లాలో జరిగిన ఈ ఘటనపై విచారణలో కీలక ఆధారంగా ఫోరెన్సిక్ నివేదిక వెలుగులోకి వచ్చింది. మాజీ ముఖ్యమంత్రి వైఎస్ జగన్ పర్యటన సందర్భంగా ఆయన కాన్వాయ్‌లోని వాహనం కింద పడి సింగయ్య మరణించినట్లు కనిపిస్తున్న వీడియోలు అసలైనవే అని నిపుణులు ధ్రువీకరించారు. ఈ వీడియోలు మార్ఫింగ్ చేసినవని వైఎస్సార్ కాంగ్రెస్ పార్టీ నాయకులు చేస్తున్న ఆరోపణల నేపథ్యంలో ఫోరెన్సిక్ నివేదిక ఎంతో కీలకంగా మారింది. సోమవారం పోలీసులకు అందిన ఈ నివేదికతో ఈ కేసులో నెలకొన్న అనేక అనుమానాలకు ముగింపు లభించింది.
వివరాలు
ప్రమాదం ఎలా జరిగింది?
గత నెల 18వ తేదీన వైఎస్ జగన్ పల్నాడు జిల్లాలో పర్యటించగా, రోడ్డుపై ఏర్పడ్డ పెద్దఎత్తున జనసందోహం మధ్య సింగయ్య అనే వ్యక్తి జగన్ ప్రయాణిస్తున్న వాహనం కింద పడి తీవ్ర గాయాలపాలయ్యారు. సంఘటన జరిగిన వెంటనే అక్కడే ఉన్న వైసీపీ కార్యకర్తలు ఆయనను రోడ్డు పక్కకు లాక్కెళ్లి వదిలేసినట్లు తెలుస్తోంది. అనంతరం సింగయ్య మరణించారు. అయితే ఈ ఘటనపై ఆరంభంలోనే పోలీసులకు తప్పుదారి పట్టించే సమాచారం అందింది. వైసీపీ నేత దేవినేని అవినాష్ అనుచరుడి వాహనం ఢీకొట్టడం వల్లే ప్రమాదం జరిగినట్టు చెబుతూ ఆ మేరకు పోలీసులు మీడియాకు సమాచారం ఇచ్చారు.
వివరాలు
వైరల్ వీడియోలతో వెలుగులోకి నిజాలు
కొద్దిరోజుల తర్వాత, సింగయ్య నేరుగా జగన్ వాహనం కింద పడి మరణిస్తున్న దృశ్యాలు ఉన్న వీడియోలు సామాజిక మాధ్యమాల్లో వైరల్ అయ్యాయి. దీంతో ఈ సంఘటనపై పెద్ద ఎత్తున చర్చలు, విమర్శలు ఊపందుకున్నాయి. అయితే ఈ వీడియోలు అసత్యమైనవని, రాజకీయంగా పార్టీని కించపరిచే కుట్రచేసారని వైసీపీ నేతలు ఆరోపించారు. దీంతో పోలీసులు రంగంలోకి దిగారు. ఘటన జరిగిన ప్రదేశంలోని డ్రోన్ ఫుటేజీ, సీసీ కెమెరా దృశ్యాలు సేకరించారు. అలాగే, అక్కడ ఉన్న కొందరు వైసీపీ కార్యకర్తల సెల్‌ఫోన్లను స్వాధీనం చేసుకుని, అందులో ఉన్న వీడియోలను ఫోరెన్సిక్ పరిశీలన కోసం పంపించారు.
వివరాలు
ఫోరెన్సిక్ నివేదిక స్పష్టత
ఇప్పటి వరకు ఆరు మొబైల్ ఫోన్ల నుంచి సేకరించిన వీడియోలపై ఫోరెన్సిక్ నిపుణులు చేసిన పరీక్షలో అవన్నీ అసలైనవేనని, ఎటువంటి మార్ఫింగ్ జరగలేదని స్పష్టంగా నిర్ధారించారు. వీటి ఆధారంగా పోలీసులు తదుపరి దర్యాప్తుకు చర్యలు తీసుకుంటున్నారు. ఇదే సమయంలో సంఘటన జరిగినప్పుడు పోలీసులకు తప్పుడు సమాచారం ఇచ్చిన వారిపై కూడా శాఖా స్థాయిలో విచారణ ప్రారంభమైనట్లు సమాచారం.