Miss World Crown: మిస్ వరల్డ్ విజేత కిరీటం ధర తెలిస్తే ఆశ్చర్యపోతారు..దాన్ని తయారు చేసే సంస్థ గురించి తెలుసా?
ఈ వార్తాకథనం ఏంటి
ప్రతి సంవత్సరం జరిగే మిస్ వరల్డ్, మిస్ యూనివర్స్ వంటి అందాల పోటీలు ప్రపంచవ్యాప్తంగా ఎంతో ఆసక్తిని కలిగిస్తాయి. వివిధ దేశాల నుంచి అద్భుతమైన సౌందర్యంతో పాటు ప్రతిభను కలిగిన యువతులు ఈ పోటీల్లో పాల్గొంటూ టైటిల్‌ను గెలుచుకోవడానికి పోటీ పడుతుంటారు. ప్రత్యేకంగా ఈసారి మిస్ వరల్డ్ పోటీలు తెలంగాణ రాష్ట్రం హైదరాబాదులో జరగడం గమనార్హం. ఈ పోటీలో విజేతగా నిలిచిన అందాల రాణికి, ఆమె అందాన్ని మించిపోయే రీతిలో తీర్చిదిద్దిన ప్రత్యేకమైన వజ్రాల కిరీటం ఉప్పెనగా ధరింపజేస్తారు. ముత్యాలు, వజ్రాలతో మెరుస్తూ ఉండే ఈ కిరీటాన్ని ఒకసారి చూస్తే మళ్లీ చూపు తిప్పలేనంత అద్భుతంగా ఉంటుంది.
వివరాలు
మిస్ వరల్డ్ కిరీట తయారీకి మికిమోటో కంపెనీ
ఈ విశిష్ట కిరీటాన్ని తయారు చేసే బాధ్యత జపాన్‌కు చెందిన "మికిమోటో"అనే ప్రసిద్ధ సంస్థదే. చాలాకాలంగా మిస్ వరల్డ్ పోటీల కోసం ఈ సంస్థ ప్రత్యేకంగా కిరీటాలను రూపొందిస్తూ వస్తోంది. ప్రస్తుతం వాడుతున్న కిరీటాన్ని 2017లో తయారు చేశారు.ఇది మిస్ వరల్డ్ పోటీ చరిత్రలో నాలుగవ కిరీటం. గతంలో వాడిన మూడు కిరీటాలనూ ఇదే సంస్థ తయారు చేసింది. కిరీటాన్ని బాగా పరిశీలిస్తే.. మధ్యలో నీలి రంగు గ్లోబ్ ఉండి,దాని చుట్టూ ఆరు తెల్లబంగారు కొమ్ములు ఉంటాయి. ఈ కొమ్ములు భూభాగాలను సూచిస్తాయి.వీటిపై ముత్యాలు,వజ్రాలతో అలంకరణ ఉంటుంది. మొత్తం కిరీటంలో నీలం,తెలుపు రంగుల మేళవింపుతో ప్రపంచ సమగ్రతకు ప్రతీకగా కనిపిస్తుంది. విజేత తలకు సరిపోయేలా ఈ కిరీటానికి ప్రత్యేక సర్దుబాటును కూడా చేస్తారు.
వివరాలు
కిరీటం ఖరీదు ఎంతంటే...
మొదటి కిరీటాన్ని1951 నుండి 1973 మధ్యకాలంలో వాడారు.అది కూడా ముత్యాలు, వజ్రాలతో నిండినదే. మికిమోటో సంస్థ ప్రతిసారీ వేరేలా డిజైన్ చేస్తూ, ప్రత్యేకతను చాటుతోంది. ఈ అద్భుతమైన కిరీటం విలువ లక్ష అమెరికన్ డాలర్లు,అంటే భారత రూపాయల విలువలో సుమారు 84 లక్షల రూపాయలు. అయితే విజేతకి ఇది శాశ్వతంగా ఇవ్వబడదు.ఆమె కేవలం మిస్ వరల్డ్‌గా ఉన్న ఏడాది పాటు మాత్రమే దీన్ని ధరించేందుకు అనుమతి ఉంటుంది. అనంతరం మిస్ వరల్డ్ సంస్థ తిరిగి దాన్ని స్వాధీనం చేసుకుంటుంది. అయితే ఆమె జ్ఞాపకార్థంగా ఒక మాదిరి కిరీటాన్ని పొందుతుంది. దీన్ని ఆమె కార్యక్రమాలకు,ప్రైవేట్ ఈవెంట్లకు వినియోగించవచ్చు. ఏడాది పాటు ఆమె మిస్ వరల్డ్‌గా తన పాత్రను నెరవేర్చేటప్పుడు అదే మాదిరి కిరీటాన్ని ధరించగలదు.
వివరాలు
ఈ కిరీటాల ప్రత్యేకత
మిస్ వరల్డ్ లేదా మిస్ యూనివర్స్ కిరీటాలు కేవలం అందానికి ప్రతీకలు కావు.. ఇవి ఎంతో ఖరీదైనవి, అర్థవంతమైనవి. ప్రపంచంలోని భిన్న సంస్కృతుల ఐక్యతను, సౌభ్రాతృత్వాన్ని సూచించేలా ఈ డిజైన్లు రూపొందిస్తారు. అందుకే ఇవి సామాన్య కిరీటాలు కాదు, ఓ విలక్షణ తలపాగా! భారతదేశానికి గర్వకారణంగా నిలిచిన అందాల రాణులు ఇప్పటివరకు భారత్‌కు మిస్ వరల్డ్ కిరీటాన్ని అందించినవారిలో ప్రముఖులు: రీటా ఫారియా, ఐశ్వర్య రాయ్, డయానా హెడెన్, యుక్తా ముఖి, ప్రియాంక చోప్రా, మానుషీ చిల్లర్. ఇందులో చివరిగా 2017లో మానుషీ చిల్లర్ ఈ గౌరవాన్ని భారత్‌కు తీసుకురావడం విశేషం. ఆ తరువాత ఇప్పటివరకు మళ్లీ ఎవ్వరూ ఈ టైటిల్‌ను గెలుచుకోలేకపోయారు.
వివరాలు
ఈసారి భారత్ తరఫున నందిని గుప్తా
మిస్ వరల్డ్ 2025 పోటీలో భారత్ తరఫున పోటీపడుతోంది ఫేమినా మిస్ ఇండియా వరల్డ్ 2023 విజేత నందిని గుప్తా. ఆమె రాజస్థాన్ రాష్ట్రం కోటా నగరానికి చెందినవారు. ప్రస్తుతం ఆమె వయస్సు 21 సంవత్సరాలు. ముంబైలోని లాలా లజపతిరాయ్ కళాశాలలో డిగ్రీ చదువుతున్నారు. దేశం మొత్తాన్ని గర్వపడేలా చేయగల ఈ యువతి విజయంపై దేశ ప్రజలంతా ఆశలు పెట్టుకున్నారు.