Throat Pain : చలికాలంలో జలుబు-దగ్గుతో వచ్చే గొంతు నొప్పి: ఎందుకు వస్తుందో తెలుసా?
ఈ వార్తాకథనం ఏంటి
చలికాలం చాలా మంది జలుబు లేదా దగ్గు సమయంలో గొంతు నొప్పితో బాధపడుతారు. ఇది ఎక్కువగా వైరల్ ఇన్‌ఫెక్షన్ల సమయంలో కనిపించే సాధారణ లక్షణం. వైరస్‌లు గొంతు భాగాన్ని ప్రభావితం చేయడంతో నొప్పి వస్తుంది. అలాగే దగ్గు, జలుబు వంటి మరికొన్ని లక్షణాలు కూడా తోడవుతాయి. ఈ సమస్య చిన్న వాళ్ల నుంచి పెద్దల వరకూ అందరిలో కనిపించొచ్చు. జలుబు, దగ్గు లేదా ఇతర వైరల్ ఇన్‌ఫెక్షన్లు వచ్చినప్పుడు, వైరస్‌లు ముందుగా ముక్కు, గొంతు, శ్వాసనాళాల్లోకి ప్రవేశిస్తాయి. రోగనిరోధక వ్యవస్థ వాటిని ఎదుర్కోవడానికి ప్రయత్నించే సమయంలో గొంతు చుట్టూ ఉన్న పొరల్లో మంటను కలిగిస్తుంది. అందువల్ల గొంతు వాపుగా అనిపిస్తుంది. వాపు ఎక్కువైతే మాట్లాడడమే కష్టంగా మారుతుంది.
వివరాలు
ఇప్పుడు ఏమి చేయాలి?
వాతావరణం చల్లబడినప్పుడు గాలి పొడి స్వభావం దాల్చుతుంది. దీనివల్ల గొంతులో తేమ తగ్గిపోతుంది. చల్లని పానీయాలు, ఐస్‌క్రీమ్ తినడం లేదా చల్లని గాలిని నేరుగా పీల్చడం వల్ల గొంతు పొరలు సన్నగిల్లి రక్తప్రసరణ తగ్గుతుంది. దీంతో ఇన్ఫెక్షన్ వచ్చే అవకాశాలు పెరుగుతాయి. ఈ పరిస్థితిలో వైరస్‌లు త్వరగా దాడి చేసి గొంతు నొప్పి, వాపు వంటి సమస్యలు కలిగిస్తాయి. వెచ్చని నీరు, టీ, నిమ్మరసం వంటి పానీయాలు తీసుకుంటే కొంత ఉపశమనం లభిస్తుంది. గోరువెచ్చని నీటిలో చిటికెడు ఉప్పు వేసి పుక్కిలిస్తే నొప్పి తగ్గుతుంది. శరీరంలో తేమ నిల్వ ఉండేందుకు ఎక్కువగా ద్రవాలు తాగాలి. లక్షణాలు తగ్గకపోతే లేదా ఎక్కువగా బాధ పెడితే వైద్యుని సంప్రదించడం మంచిది.