KYC Troubles: కేవైసీ కోసం కష్టాలు..ఈశాన్య రాష్ట్రాల వారిని గుర్తించని టెక్నాలజీ ఇదేనా? నాగాలాండ్ మంత్రి షేర్ చేసిన వీడియో వైరల్
ఈ వార్తాకథనం ఏంటి
నాగాలాండ్ మంత్రి టెంజెన్ ఇమ్నా అలోంగ్ సోషల్ మీడియాలో ఎంత యాక్టివ్గా ఉంటారో ప్రత్యేకంగా చెప్పాల్సిన అవసరం లేదు. ఆయన తరచూ సరదాగా, అదే సమయంలో ఆలోచింపజేసే వీడియోలను తన సోషల్ మీడియా ఖాతాల్లో పంచుకుంటూ ఉంటారు. తాజాగా ఆయన షేర్ చేసిన ఓ వీడియో ఇప్పుడు వైరల్గా మారింది. అయితే ఇది కేవలం నవ్వులు పూయించే వీడియోగానే కాకుండా.. టెక్నాలజీలోని కొన్ని పరిమితులపై పెద్ద చర్చకు దారితీసింది. ఫేషియల్ రికగ్నిషన్ టెక్నాలజీ పదేపదే విఫలమవడంతో కేవైసీ పూర్తి చేసేందుకు ఓ వ్యక్తి పడుతున్న ఇబ్బందులను ఈ వీడియో హాస్యభరితంగా చూపిస్తుంది. ఇప్పటికే ఈ వీడియోకు 3.5 లక్షలకు పైగా వ్యూస్, 10 వేలకు పైగా లైకులు వచ్చాయి.
వివరాలు
కళ్లను సాగదీసి మరీ ఫొటో!
ఈ వీడియో ఈశాన్య రాష్ట్రాలకు చెందిన ప్రజలంతా ఒకేలా కనిపిస్తారనే మూస ధోరణిని ఆధారంగా చేసుకున్నట్లు కనిపిస్తోంది.
అయితే మంత్రి దానికి హాస్యాన్ని జోడిస్తూ 'స్ట్రగుల్ ఈజ్ రియల్' అంటూ క్యాప్షన్ పెట్టి పోస్ట్ చేశారు.
వీడియోలో కేవైసీ కోసం ఫొటో తీసుకునేందుకు ప్రయత్నిస్తున్న ఓ వ్యక్తి కళ్లు స్పష్టంగా కనిపించేలా చేయడానికి గ్రామస్థులు ఆయన కనురెప్పలను పట్టుకుని సాగదీస్తుంటారు.
ఈ సన్నివేశం నవ్వు తెప్పించేలా ఉంది.
వివరాలు
అయితే నవ్వుల వెనుక అసలు సమస్య ఇదే!
వీడియోలోని హాస్యాన్ని పక్కనపెడితే.. అందులో ఉన్న సాంకేతిక సమస్యను నెటిజన్లు వెంటనే గుర్తించారు.
ఫేషియల్ రికగ్నిషన్ టెక్నాలజీలో ఉన్న లోపాలను ఎత్తిచూపుతూ, ఇలాంటి సమస్యలకు సరైన పరిష్కారం చూపించాలని పలువురు డిమాండ్ చేస్తున్నారు.
'సమస్య టెక్నాలజీది.. మీది కాదు. భారతీయులందరినీ దృష్టిలో ఉంచుకుని దీన్ని రూపొందించలేదు' అని ఓ యూజర్ కామెంట్ చేశారు.
దీంతో ఈ వీడియో కేవలం వినోదానికి పరిమితం కాకుండా టెక్నాలజీని రూపొందించే విధానంపై చర్చకు దారితీసింది.
వివరాలు
ప్రత్యామ్నాయ పద్ధతులు ఉండాలంటున్న నెటిజన్లు
కొందరి కళ్ల నిర్మాణం ప్రత్యేకంగా ఉండటం వల్ల ఇలాంటి సమస్యలు ఎదురవుతున్నాయని పలువురు అభిప్రాయపడ్డారు.
ఇలాంటి వ్యక్తుల ఐరిస్ స్కాన్ కోసం ఎలాంటి స్కానర్లు అందుబాటులో ఉన్నాయో చెప్పాలంటూ మరో యూజర్ 'ఎక్స్'కు చెందిన ఆర్టిఫిషియల్ ఇంటెలిజెన్స్ చాట్బాట్ 'గ్రాక్'ను ప్రశ్నించడం కూడా గమనార్హం.
'ప్రజలు తమ సహజ శారీరక లక్షణాల కారణంగా ఇబ్బందులు పడకూడదు.
వేలిముద్రల వంటి ప్రత్యామ్నాయ పద్ధతులను కూడా అనుమతించాలి' అని మరికొందరు సూచించారు.
కేవైసీ ప్రక్రియలో ఒకే రకమైన ఫేషియల్ రికగ్నిషన్పై ఆధారపడకుండా ఇతర మార్గాలను కూడా అందుబాటులో ఉంచాలని వారు కోరుతున్నారు.
వివరాలు
చైనా, జపాన్లను ఎందుకు అనుసరించకూడదు?
చైనా, జపాన్ వంటి దేశాలు ఇలాంటి సమస్యలకు ఇప్పటికే పరిష్కారాలు కనుగొని ఉండవచ్చని కొందరు నెటిజన్లు పేర్కొన్నారు.
అక్కడ అందుబాటులో ఉన్న సాంకేతిక పరిష్కారాలను భారత ప్రభుత్వం ఎందుకు స్వీకరించకూడదని ప్రశ్నించారు.
భారతదేశంలోని భిన్నమైన ప్రజల శారీరక లక్షణాలను దృష్టిలో పెట్టుకుని టెక్నాలజీని మరింత సమగ్రంగా అభివృద్ధి చేయాల్సిన అవసరం ఉందని అభిప్రాయపడ్డారు.
వివరాలు
ఇలాంటి వీడియోలు షేర్ చేయడం టెంజెన్కు అలవాటే!
నాగాలాండ్ మంత్రి టెంజెన్ ఇమ్నా అలోంగ్ తన సోషల్ మీడియా ఖాతాల్లో ఇలాంటి సరదా, ఆలోచింపజేసే వీడియోలను తరచూ పంచుకుంటుంటారు.
గతంలో ఇండోర్కు చెందిన ఓ ట్రాఫిక్ పోలీస్ మైఖేల్ జాక్సన్ స్టైల్లో డ్యాన్స్ చేస్తూ ట్రాఫిక్ను నియంత్రించిన వీడియోను కూడా ఆయన షేర్ చేశారు.
ఆ వీడియో కూడా అప్పట్లో అందరి దృష్టిని ఆకర్షించింది.
మొత్తంగా చూస్తే..టెంజెన్ షేర్ చేసిన తాజా వీడియో నవ్వులు పూయించడంతో పాటు ఓ తీవ్రమైన సాంకేతిక సమస్యను వెలుగులోకి తీసుకొచ్చింది.
కేవైసీ ప్రక్రియలో ఫేషియల్ రికగ్నిషన్ విఫలమయ్యే సందర్భాల్లో ప్రత్యామ్నాయ మార్గాలు అందుబాటులో ఉండాలా? టెక్నాలజీని దేశంలోని అన్ని వర్గాల ప్రజలకు అనుగుణంగా మరింత మెరుగుపరచాలా?అనే ప్రశ్నలపై ఈ వీడియోతో మరోసారి విస్తృత చర్చ మొదలైంది.
ట్విట్టర్ పోస్ట్ చేయండి
ఫేషియల్ రికగ్నిషన్ ఫెయిల్.. కేవైసీ కోసం వ్యక్తి పడిన కష్టాల వీడియో వైరల్
Struggle is Real... pic.twitter.com/1WuQprLWA3
— Temjen Imna Along (@AlongImna) August 12, 2026