ప్రేరణ: నువ్వు చేసిన మంచి, మళ్ళీ నీ దగ్గరికి తిరిగి వస్తుంది
ఈ వార్తాకథనం ఏంటి
స్వార్థం లేకుండా అవతలి వారికి మంచి చేసినపుడు అదెలా అయినా మళ్ళీ మీ దగ్గరకు వస్తుంది. అందుకే వీలైనంత మటుకు అవతలి వారికి చెడు చేయకుండా ఉండండి. మీకు వీలైతే ఖచ్చితంగా మంచి చేయండి. దీనికోసం మీరు పెద్దగా డబ్బులు ఖర్చుపెట్టాల్సిన అవసరం లేదు. చాలామంది ఇదే తప్పు చేస్తారు. ప్రతీదాన్ని డబ్బుతోనే చూస్తారు. కానీ మంచి చేయడానికి డబ్బులు ఉండాల్సిన అవసరం లేదు. ఎవరో తెలియని వాళ్ళు మీ ఊరికి వచ్చి, ఎవరిదైనా అడ్రెస్ అడిగారనుకుందాం. వారికి అడ్రెస్ చెప్పి, వీలైతే వాళ్ళని ఆ అడ్రెస్ లో ఉన్న ఇంటికి చేరవేయడం కూడా మంచిపనే. కొందరు ఇలాంటి చిన్న చిన్న పనులు కూడా చేయరు.
ప్రేరణ
నువ్వేది ఇస్తే నీకదే దొరుకుతుంది
అవతలి వారికి మంచి చేసే టైమ్ లేదని కొంతమంది భావిస్తారు. ఇలాంటి వాళ్లే తమకు ఏదైనా సాయం కావాల్సిన వచ్చినపుడు ఎవ్వరూ రాకపోతే, ఈ మనుషుల్లో మంచితనం చచ్చిపోయిందని అంటారు. తామెప్పుడూ అవతలి వారికి మంచి చేయలేదన్న వాస్తవాన్ని గుర్తించరు. కనీసం ఆ ఆలోచన కూడా వారికి రాదు. నువ్వు ఎవ్వరికి మంచి చేయకుండా నీకు మంచి జరగడం లేదని ఎలా బాధపడతావ్? అందుకే నువ్వు మంచి చేయాలి. ఈ ప్రపంచానికి నువ్వేది ఇస్తే అదే నీకు తిరిగి వస్తుంది. అందుకే వీలైనంత మటుకు మంచి చేస్తూ ఉండండి. మీకు మంచి జరుగుతూ ఉంటుంది. ఒక్కోసారి మీరు చేసే చిన్న మంచిపని కూడా మీ జీవితాన్ని పూర్తిగా మార్చే మరో మంచిపనికి దారితీయవచ్చు.