New Obesity Diagnosis Method: ఊబకాయాన్ని గుర్తించేందుకు కొత్త పద్దతి...బీఎంఐ ఒక్కటే సరిపోదు
ఈ వార్తాకథనం ఏంటి
బరువు ఎక్కువగా ఉందని వెంటనే ఊబకాయం ఉన్నట్లు నిర్ధారించడం సరైన పద్ధతి కాదని వైద్య నిపుణులు చెబుతున్నారు. ప్రస్తుతం ఊబకాయాన్ని గుర్తించేందుకు ఉపయోగిస్తున్న బాడీ మాస్ ఇండెక్స్ (BMI) విధానంలో అనేక లోపాలు ఉన్నాయని, దీనివల్ల ప్రపంచవ్యాప్తంగా లక్షలాది మందికి తప్పుడు నిర్ధారణ జరుగుతోందని వెల్లడించారు. BMIతో పాటు నడుము కొలతలు, శరీరంలోని కొవ్వు పరిమాణం, అవయవాల పనితీరును కూడా పరిశీలించే కొత్త విధానాన్ని ప్రతిపాదించారు. దీనివల్ల ఆరోగ్యంగా ఉన్నవారిని అనవసరంగా రోగులుగా పరిగణించే పరిస్థితి తగ్గుతుంది.
Details
80 లక్షల మందికాదు.. 8 లక్షల మందిపై పరిశోధన!
లండన్‌లోని కింగ్స్ కాలేజీ ప్రొఫెసర్ ఫ్రాన్సిస్కో రూబినో నేతృత్వంలోని పరిశోధకులు బ్రిటన్, అమెరికా, చైనా, స్పెయిన్ దేశాలకు చెందిన 8 లక్షల మందికి పైగా ఆరోగ్య వివరాలను విశ్లేషించారు.
15 ఏళ్ల వరకు వారి ఆరోగ్య పరిస్థితులను పరిశీలించారు. ఈ పరిశోధనలో BMI ఒక్కటే ఉపయోగిస్తే ఊబకాయం ఉన్నవారిలో 5 నుంచి 9 శాతం మందిని గుర్తించలేకపోతున్నట్లు తేలింది.
మరోవైపు ఆరోగ్యంగా ఉన్నవారిలో 3 శాతం వరకు ఊబకాయం ఉన్నట్లు తప్పుడు నిర్ధారణ జరుగుతున్నట్లు గుర్తించారు.
Details
నడుము కొలత కూడా కీలకమే!
BMIని లెక్కించేందుకు బరువును కిలోగ్రాముల్లో తీసుకుని, ఎత్తు మీటర్లలో తీసి దాని వర్గంతో భాగిస్తారు.
సాధారణంగా BMI 30 దాటితే ఊబకాయంగా పరిగణిస్తారు. అయితే కొత్త విధానంలో నడుము కొలత, ఎత్తుకు నడుము నిష్పత్తిని కూడా పరిశీలిస్తారు.
పురుషుల్లో 102 సెంటీమీటర్లు, మహిళల్లో 88 సెంటీమీటర్లకు మించిన నడుము కొలతను అధిక కొవ్వుకు సూచనగా తీసుకుంటారు.
Details
ఊబకాయంలోనూ రెండు రకాలున్నాయట!
కొత్త విధానం ప్రకారం ఊబకాయాన్ని క్లినికల్, ప్రీ-క్లినికల్ అని రెండు రకాలుగా విభజించారు.
శరీరంలో అధిక కొవ్వు వల్ల గుండె, మూత్రపిండాలు వంటి అవయవాల పనితీరు దెబ్బతింటే క్లినికల్ ఊబకాయంగా పరిగణిస్తారు.
ఆరోగ్యానికి ముప్పు ఉన్నా అవయవాలపై ప్రభావం కనిపించకపోతే ప్రీ-క్లినికల్ ఊబకాయంగా గుర్తిస్తారు.
ప్రీ-క్లినికల్ ఊబకాయం ఉన్నవారిలో 80 నుంచి 90 శాతం మందికి పదేళ్లలో క్లినికల్ ఊబకాయం రాలేదని పరిశోధన వెల్లడించింది.
Details
చికిత్సలోనూ మార్పులు వచ్చే అవకాశం!
ఒకే BMI ఉన్న ముగ్గురికి ఆరోగ్య పరిస్థితులు వేర్వేరుగా ఉండవచ్చని నిపుణులు వివరిస్తున్నారు. అందుకే బరువు ఆధారంగా మాత్రమే చికిత్స నిర్ణయించకుండా వ్యక్తిగత ఆరోగ్య పరిస్థితిని పరిశీలించాలి.
జీవనశైలి మార్పులు, బరువు తగ్గించే మందులు లేదా అవసరమైతే శస్త్రచికిత్స వంటి చికిత్సలను మరింత కచ్చితంగా ఎంపిక చేసుకోవచ్చని పరిశోధకులు అభిప్రాయపడుతున్నారు.
ఈ కొత్త విధానం వైద్యులకు కొంత అదనపు పరీక్షల భారాన్ని పెంచినా, రోగులకు మెరుగైన వైద్యం అందించడంలో ఉపయోగపడే అవకాశం ఉంది.