Parkinson's Disease: మెదడులోని రక్తనాళాల్లో మార్పులే పార్కిన్సన్స్ వ్యాధి తీవ్రతకు కారణం.. ఆస్ట్రేలియా పరిశోధనలో కీలక విషయాల వెల్లడి
ఈ వార్తాకథనం ఏంటి
పార్కిన్సన్స్ వ్యాధి గురించి ఇంతవరకు ఉన్న శాస్త్రీయ దృష్టికోణాన్ని మార్చే ముఖ్యమైన ఆవిష్కరణను ఆస్ట్రేలియా శాస్త్రవేత్తలు వెలుగులోకి తెచ్చారు. ఈ వ్యాధి సమయంలో మెదడులోని రక్తనాళాల్లో గణనీయమైన మార్పులు చోటుచేసుకుంటాయని, ఇవే వ్యాధి పురోగతికి కీలక కారణమని వారి తాజా అధ్యయనం స్పష్టంచేస్తోంది. ఈ కొత్త అవగాహన భవిష్యత్తులో పార్కిన్సన్స్ చికిత్సకు వినూత్న మార్గాలను తెరుస్తుందని నిపుణులు భావిస్తున్నారు.
వివరాలు
ప్రోటీన్ల కంటే రక్తనాళాల పాత్రే ఎక్కువని గుర్తింపు
ఇప్పటివరకు పార్కిన్సన్స్‌కు ప్రధాన కారణంగా మెదడులో ఆల్ఫా-సిన్యూక్లిన్ అనే ప్రోటీన్ అతిగా పేరుకుపోవడమే అని వైద్యరంగం నమ్మేది. అయితే, న్యూరోసైన్స్ రీసెర్చ్ ఆస్ట్రేలియా (NeuRA) విడుదల చేసిన తాజా నివేదిక ప్రకారం, ప్రోటీన్ పేరుకుపోవడం కంటే మెదడులోని రక్తనాళాల్లో ఏర్పడే నిర్మాణాత్మక మార్పులే వ్యాధి తీవ్రతను ప్రభావితం చేస్తున్నాయని కొత్త ఆధారాలు చెబుతున్నాయి. "సాధారణంగా పరిశోధనలు ప్రోటీన్లు, నర కణాల నష్టం వంటి అంశాలకే పరిమితమయ్యాయి. కానీ మా పరిశోధనలో రక్తనాళాల వ్యవస్థపై పడుతున్న ప్రభావాన్ని స్పష్టంగా చూపగలిగాం" అని ఈ అధ్యయనంలో ప్రముఖ పరిశోధకురాలు డెర్యా డిక్ వెల్లడించారు.
వివరాలు
అసాధారణంగా పెరుగుతున్న 'స్ట్రింగ్ వెస్సెల్స్'
పరిశోధనలో భాగంగా మెదడులోని కొన్ని కీలక ప్రాంతాల్లో రక్తనాళాలు బలహీనపడుతున్నాయని, ముఖ్యంగా పనికిరాని రక్త కేశనాళికల అవశేషాలు.. 'స్ట్రింగ్ వెస్సెల్స్'.. అసాధారణంగా పెరుగుతున్నాయని వారు గుర్తించారు. ఈ మార్పులు రక్త ప్రసరణ విధానాన్ని దెబ్బతీయడంతో పాటు, మెదడు రక్షణ వ్యవస్థ అయిన బ్లడ్-బ్రెయిన్ బ్యారియర్ పనితీరులో కూడా లోపాలు కలుగుతున్నాయని వివరించారు. యూనివర్సిటీ ఆఫ్ న్యూ సౌత్ వేల్స్, యూనివర్సిటీ ఆఫ్ సిడ్నీ పరిశోధకులు కలిసి నిర్వహించిన ఈ అధ్యయనం ప్రతిష్టాత్మక 'బ్రెయిన్' జర్నల్‌లో ప్రచురితమైంది.
వివరాలు
ఈ ఆవిష్కరణతో కొత్త చికిత్సలకు మార్గం సుగమం
రక్తనాళాల్లో జరిగే ఈ మార్పులనే లక్ష్యంగా చేసుకొని చికిత్సా పద్ధతులను అభివృద్ధి చేస్తే, పార్కిన్సన్స్ తీవ్రతను గణనీయంగా తగ్గించే అవకాశముందని పరిశోధక బృందం చెప్పింది. ప్రస్తుతం ఇదే తరహా రక్తనాళ మార్పులు అల్జీమర్స్ సహా ఇతర మతిమరుపు వ్యాధుల్లో ఉన్నాయా అనేదానిపై కూడా వారు పరిశోధన కొనసాగిస్తున్నారు. ప్రపంచ ఆరోగ్య సంస్థ ప్రకారం, పార్కిన్సన్స్ అనేది కదలికలు, మానసిక స్థితి, నిద్ర, ఇతర నాడీ సంబంధిత కార్యకలాపాలను ప్రభావితం చేసే దీర్ఘకాలిక వ్యాధి. దీనికి ఇప్పటికీ పూర్తిగా నయం చేసే చికిత్స లభించలేదు.