అక్వేరియంలో చేపలను పెంచుతున్నారా? ఈ జాగ్రత్తలు పాటించండి.
కుక్కలు, పిల్లులను పెంచడం కంటే చేపలను పెంచడం చాలా సులభం. చేపలను ఆడించడం, బయటకు తీసుకెళ్లడం లాంటివి ఉండవు కాబట్టి చాలా ఈజీగా పెంచవచ్చు. అయితే కొన్ని జాగ్రత్తలు మాత్రం తీసుకోవాలి. సహజ సిద్ధమైన వాతావరణాన్ని సృష్టించండి మీరు పెంచే చేపల సైజును బట్టి ఎక్వేరియం ట్యాంకును సెలెక్ట్ చేసుకోవాలి. ఆ ట్యాంకును సూర్యకిరణాలు డైరెక్టుగా పడేచోట ఉంచకూడదు. దానివల్ల అక్వేరియంలో నాచు పెరిగే అవకాశం ఉంటుంది. గులకరాళ్లను, ఇసుకను ఎక్వేరియంలో ఉంచితే బాగుంటుంది. అలాగే చేపలు దాక్కొని ఉండడానికి ఒక ప్రత్యేకమైన స్థలాన్ని ఎక్వేరియంలో క్రియేట్ చేయాలి. ఇంకో విషయం, నీటి పిహెచ్ విలువలను ఎప్పటికప్పుడు చెక్ చేస్తూ ఉండాలి.
చేపకన్ను పరిమాణంలో ఆహారం అందించాలి
క్లోరిన్ ఎక్కువగా ఉన్న నీటిని ట్యాంక్ లో నింపకూడదు. ఒకవేళ మీరు వాడే వాటర్ లో క్లోరిన్ ఎక్కువగా ఉందని మీకనిపిస్తే, ఆ నీళ్ళని ఎండలో 24గంటల పాటు ఉంచాలి, దానివల్ల క్లోరిన్ తగ్గిపోతుంది. నీటిలో పెరిగే చిన్న మొక్కలను అక్వేరియంలో ఉంచాలి. ఇలా చేయడం వల్ల ఆక్సిజన్ స్థాయిలు పెరగడమే కాకుండా నీళ్లలో ఉండే నైట్రేట్ తొలగిపోతుంది. జావా గడ్డి హార్న్ వాట్ గడ్డి మొదలైన చిన్న చిన్న మొక్కలను ట్రై చేయండి. అతిగా తినిపించకూడదు చేపలకు ఎక్కువ ఆహారం వేయడం వల్ల ట్యాంక్ లో అమోనియా, నైట్రేట్ పెరుగుతుంది. ఇది నాచు పెరగడానికి కారణం అవుతుంది. చేప కన్ను ఎంత పరిమాణంలో ఉంటుందో అంత పరిమాణంలో మాత్రమే ఆహారం ఇవ్వాలి.
