Loading...
Social Media Creators: క్రియేటర్ల వీడియోలనే కాపీ చేస్తున్న ఏఐ.. వ్యూస్‌లోనూ ఏఐదే హవా
క్రియేటర్ల వీడియోలనే కాపీ చేస్తున్న ఏఐ.. వ్యూస్‌లోనూ ఏఐదే హవా

Social Media Creators: క్రియేటర్ల వీడియోలనే కాపీ చేస్తున్న ఏఐ.. వ్యూస్‌లోనూ ఏఐదే హవా

వ్రాసిన వారు Balachander Sharma
Nov 22, 2026
04:51 pm

ఈ వార్తాకథనం ఏంటి

ఆర్టిఫిషియల్‌ ఇంటెలిజెన్స్‌ టూల్స్ అందుబాటులోకి రావడంతో వీడియోలు తయారు చేయడం గతంలో కంటే సులభమైంది. అయితే కొందరు ఇదే సాంకేతికతను ఉపయోగించి ప్రముఖ క్రియేటర్లను పోలిన డిజిటల్ పాత్రలను సృష్టిస్తున్నారు. వారు చేసే జోకులు, డ్యాన్స్‌లు, వీడియోల శైలిని అనుకరిస్తున్నారు. గిటారిస్ట్ సోఫీ లాయిడ్‌కు కూడా ఇలాంటి అనుభవమే ఎదురైంది. ఆమె వీడియోల్లోని సంగీతం, శరీర కదలికలు, ముఖ కవళికలను సైతం ఓ ఏఐ పాత్ర అనుకరించింది. అసలైన వ్యక్తి ప్రమేయం లేకుండానే వారి డిజిటల్ రూపాలు సోషల్ మీడియాలో వైరల్ అవుతుండటం ఇప్పుడు కొత్త సమస్యగా మారింది.

Details

ఏఐ దుర్వినియోగంపై గళమెత్తుతున్న క్రియేటర్లు

ఈ వ్యవహారంపై కెజెటిల్ క్రోగ్‌స్టాడ్‌, గ్రేస్ రాబర్ట్స్ వంటి క్రియేటర్లు కూడా తమ ఆందోళనను వ్యక్తం చేస్తున్నారు.

మరోవైపు ప్రముఖ హాస్యనటి జూలియా జసునాస్ ఇటీవల ఇన్‌స్టాగ్రామ్ వీడియోలో కీలకమైన విషయాన్ని ప్రస్తావించారు.

ఏఐ బాట్‌లు వైరల్ అవుతున్నాయని, వాటిని చూసే ప్రజలు నిజమైన మనుషులేనని నమ్ముతున్నారని ఆమె ఆందోళన వ్యక్తం చేశారు.

అంటే ఏఐ సృష్టించిన పాత్రలు కేవలం వినోదానికే పరిమితం కాకుండా, ప్రేక్షకులను తప్పుదోవ పట్టించే పరిస్థితి కూడా కనిపిస్తోంది.

Details

కాపీరైట్ చట్టాలపై కొత్త చర్చ

క్రియేటర్ల సమస్య ఇప్పుడు చట్టపరమైన చర్చకు కూడా దారితీస్తోంది.

బ్రిటన్‌లోని అతిపెద్ద వినోద రంగ కార్మికుల సంఘం ప్రస్తుత కాపీరైట్ చట్టాలు ఏఐ దుర్వినియోగాన్ని అడ్డుకోవడానికి సరిపోవడం లేదని అభిప్రాయపడుతోంది.

కళాకారుల అనుమతి లేకుండా వారి రూపం, సంగీతం, సృజనాత్మకతను ఉపయోగించకుండా స్పష్టమైన నిబంధనలు అవసరమని ఈ సమస్య సూచిస్తోంది.

ADVERTISEMENT

Details

పరిష్కారాల కోసం సోషల్ మీడియా సంస్థల ప్రయత్నాలు

ఈ పరిణామాల నేపథ్యంలో మెటా వంటి సోషల్ మీడియా సంస్థలు కూడా సమస్యకు పరిష్కారాలు వెతుకుతున్నాయి.

ఏఐతో రూపొందించిన కంటెంట్‌ను ఎలా గుర్తించాలి? అసలైన క్రియేటర్ల హక్కులను ఎలా కాపాడాలి? నకిలీ ఖాతాలపై ఎలాంటి చర్యలు తీసుకోవాలి? అనే అంశాలు కీలకంగా మారాయి.

సాంకేతికత అభివృద్ధి చెందుతున్న కొద్దీ దాని వినియోగానికి బాధ్యత కూడా పెరగాల్సిన అవసరం ఉంది.

లేదంటే రేపటి రోజుల్లో అసలైన కళాకారుల గుర్తింపే ప్రశ్నార్థకంగా మారే ప్రమాదం ఉంది.

ADVERTISEMENT